Mádenıet jáne sport qaıratkerleri koronavırýspen jumyla kúresýge shaqyrdy
NUR-SULTAN. QazAqparat - Intellıgentsııa ókilderi, mádenıet jáne sport qaıratkerleri koronavırýs ınfektsııasynyń aldyn alý úshin qaýipsizdik erejelerin ustanýǵa shaqyryp, vıdeo jarııalady, dep habarlaıdy QazAqparat.
Vıdeo Prezıdent Qasym-Jomart Toqaevtyń el halqyna úndeýin qoldaýǵa baǵyttalǵan.
Olardyń aıtýynsha, koronavırýs ınfektsııasynyń taralýyna jol bermeý maqsatynda memlekettik organdar tarapynan aýqymdy sharalar qabyldanýda jáne bul qıyndyqty birlese otyryp eńseretin bolamyz.
«Qazaqta sóz bar «saqtansań, saqtaımyn» degen. Bul indetke qarsy el, memleket bolyp qorǵanýymyz qajet. Mundaı kezde sasqalaqtap, ushqalaqtyqqa urynyp, indetti kúsheıtip almaýymyz kerek. Barynsha tártipke baǵynyp, dárigerlerdiń aıtqan nusqaýlyǵyn oryndaıyq. Bul qıyndyqty da birige otyryp eńseremiz», - dedi aqyn Nesipbek Aıtuly.
«Barys» hokkeı komandasynyń shabýylshysy Roman Starchenko óz jankúıerlerine osynaý qıyn kezde bir-birine qoldaý kórsetýge shaqyrdy. «Bul – koronavırýs pandemııasyna oraı qabyldanǵan ýaqytsha shara. Biz qashanda sizderdiń qoldaýlaryńyzdy sezinip kelemiz. Biz jaqsy oıyn kórsetip, sizderdi qýantqymyz keledi. Osy kezeńde bizdi, bir-birlerińizdi qoldańyzdar», - deıdi hokkeıst R. Starchenko.
Qazaqstannyń eńbek sińirgen sport sheberi, Olımpıada oıyndarynyń júldegeri Gıýzel Manıýrova memleket tarapynan qabyldanǵan sharalardy qoldaýǵa shaqyrdy. Onyń sózinshe, barlyq sporttyq sharalar toqtatyldy. Alaıda, buǵan qaramastan bizdiń sportshylar saıystarda jaqsy nátıjeler kórsetý úshin jattyǵyp jatyr. «Qurmetti dostar, qazir koronavırýs álemniń kóptegen elinde taralýda. Men bizdiń elimizde bul indetti jeńetinine senemin. Jeke tazalyqty saqtańyzdar. Qıyndyqty tek birlese otyryp ǵana eńseremiz», - dep atap ótti G. Manıýrova.
