Mádenıet jáne qoǵam qaıratkerleri elordalyqtardy vaktsına alýǵa shaqyrdy

NUR-SULTAN. QazAqparat - Elorda turǵyndaryn vaktsınalaý naýqany qyzý júrip jatyr. Mádenıet qyzmetkerleri men qoǵam qaıratkerleri ımmýndaýdan ótti, dep habarlaıdy QazAqparat qala ákimdiginiń resmı saıtyna silteme jasap.

«Tolyq tekserildim jáne vaktsınany esh qorqynyshsyz aldym. Qýanyshyma oraı bári jaqsy, ózimdi oıdaǵydaı sezinemin. Óz densaýlyǵyńyzǵa jaýapkershilikpen qarap, vaktsına alýǵa shaqyramyn», - dedi Nur-Sultan qalasy ákimdigi memlekettik akademııalyq fılarmonııasynyń klassıkalyq jáne estradalyq vokal bóliminiń kórkemdik jetekshisi Araılym Rahym.

Aıta ketý kerek, vaktsınatsııa – ujymdyq ımmýnıtetti damytýdyń jáne koronavırýstyń elde taralýyn toqtatýdyń jalǵyz tásili.

«Men elorda turǵynymyn. Ǵylym salasynda jumys isteımin. Sondaı-aq, kópbalaly otbasymyn. Balalarym men jaqyndarym jáne ózim úshin ekpe aldym. Elorda turǵyndary men qonaqtaryn, jalpy halqymyzdy vaktsına alýǵa shaqyramyn. Tumshalanyp júretin maskany sheshetin ýaqyt keldi», - dedi «Qasıetti Qazaqstan» ǴZO jetekshisi Batyrhan Jumabaev.

«Vaktsınany sáýir aıynda aldym. Bári jaqsy ótti, eshqandaı aýyrsyný bolǵan joq. Týystaryńyzdy, balalaryńyzdy, ata-analaryńyzdy, ata-ájelerińizdi jáne jaqyn dostaryńyzdy qorǵaý úshin COVID-19 vaktsınasyn qabyldaýǵa shaqyramyn. Aman bolyńyzdar!» - dedi elordalyq tsırktiń manej ınspektory Joldasbek Imashev.

Aıta keteıik, densaýlyq saqtaý basqarmasynyń málimetinshe Nur-Sultanda vaktsınanyń birinshi komponentin 308 myńnan astam adam aldy.

187 myńǵa jýyq qala turǵyny tolyq ımmýndaýdan ótti.

Esterińizge sala keteıik, buǵan deıin Nur-Sultan qalasynyń ákimi Altaı Kólginov pen qalanyń bas sanıtar dárigeri elordalyqtardy COVID-19-ǵa qarsy vaktsınatsııadan ótýge shaqyrǵan bolatyn.