Mádenıet jáne aqparat mınıstrliginde depýtattar men BAQ-tyń qatysýymen bos laýazymdarǵa irikteý júrip jatyr
ASTANA. 14 mamyr. QazAqparat - Búgin QR Mádenıet jáne aqparat mınıstrliginde qoǵamdyq uıymdar ókilderiniń, depýtattardyń, BAQ-tyń qatysýymen bos laýazymdarǵa konkýrstyq irikteý ótkizilip jatyr.
Konkýrstyq komıssııanyń otyrysyna senator, «Nur Otan» HDP-nyń Sybaılas jemqorlyqqa qarsy kúres jónindegi respýblıkalyq komıssııanyń tóraǵasy Oralbaı Ábdikárimov, Májilis depýtattary Aıgúl Soloveva, Svetlana Romanovskaıa, Murat Ábenov, sondaı-aq «Ult taǵdyry» QB jetekshisi Dosmahambet Kóshim, Adam quqyqtary jónindegi Eýropalyq ınstıtýttyń jetekshisi Marat Bashımov jáne basqa da belgili azamattar qatysyp jatyr.
Mınıstrliktiń taratqan málimetine qaraǵanda, ashyq konkýrs 6 bos laýazymǵa negizdelip otyr. Bos oryndar mınıstrliktiń qaıta qurylymdaýynan keıin paıda boldy. Konkýrsqa qatysý týraly 106 adam ótinishterin berdi. Sonyń ishinde Qoǵamdyq-saıası jumystar departamentiniń sarapshysy qyzmetine 66 adam nıet bildirgen. Aıta keteıik, 7-8 mamyrda zańnamany bilý deńgeıine testileý ótkizilip, 81 kandıdat synnan súrinbeı ótken kórinedi. Endi eki kún ishinde olar konkýrstyq komıssııada tekseriletin bolady.
«Osyndaı ashyq túrde kadrlardy irikteýde mınıstrlik úlgi kórsetip otyr. Prezıdenttiń qoıyp otyrǵan talabyna sáıkes kadrlardy jumysqa alýda bul jaqsy bastama jáne osyny qoldaý kerek. Elimizdiń memlekettik qyzmetinde bul qadamdardy jalǵastyrý qajet», - dedi O. Ábdikárimov.
