Mádenıet jáne aqparat mınıstrligi jýrnalıstik etıka kodeksiniń jobasyn ázirleýge kirisetin bolady
ASTANA. 12 shilde. QazAqparat - QR Mádenıet jáne aqparat mınıstrligi BAQ-pen ózara árekettestik jónindegi keńes otyrysyn jaqyn aralyqta ótkizbekshi.
Osy keńes barysynda jýrnalıstik etıka kodeksiniń jobasyn ázirleý jónindegi másele qarastyrylady. Bul týraly búgin Astanada «Qazaqstandyq zańnamany sóz bostandyǵynyń halyqaralyq standarttaryna jaqyndastyrý perspektıvalary» atty jıyn barysynda Mádenıet jáne aqparat mınıstrligi Aqparat jáne muraǵat komıtetiniń tóraǵasy Bolat Qalıanbekov málim etti.
Esterińizge sala keteıik, osy aptada Memleket basshysy N. Nazarbaev «Qazaqstannyń áleýmettik jańǵyrtylýy: Jalpyǵa Ortaq Eńbek Qoǵamyna qaraı 20 qadam» atty maqalasynda otandyq BAQ salasyna qatysty másele kótergen bolatyn. Onda Prezıdent «Otandyq BAQ-tardy jańǵyrtý baǵdarlamanyń mańyzdy baǵyty bolýy tıis. BAQ salasy jýrnalıstik etıkanyń Ulttyq kodeksiniń naqty úlgileri, sol sııaqty tutynýshyny burmalanǵan jáne shynaıy emes aqparattan qorǵaıtyn zańdy normalar negizinde jumys isteýi kerek» degen edi. «Mádenıet jáne aqparat mınıstrligi búgingi tańda BAQ jáne úkimettik emes uıymdarmen yntymaqtastyqqa basa nazar aýdarady. Byltyrǵy jyly Prezıdent janyndaǵy BAQ máseleleri jónindegi keńes jumysyn toqtatyp, onyń ornyna mınıstrlik óz janynan osyǵan uqsas qurylym qurǵan. Qazirgi tańda Elbasynyń jýrnalıstik etıka kodeksiniń jobasy týraly tapsyrmasyna sáıkes jumystar júrgizilýde. Buǵan qatysty otyrys aldaǵy ýaqytta júzege asady», - deıdi komıtet tóraǵasy.
Onyń aıtýynsha, mınıstrlik janyndaǵy keńeske 29 múshe enip otyr. Olardyń arasynda «Ádil sóz» qorynyń jetekshisi Tamara Kaleeva men Jýrnalıster odaǵynyń tóraǵasy Seıitqazy Mataev bar.
