Mádenıet jáne aqparat mınıstrligi barlyq memlekettik telearnalardy kábildi telearna toptamasyna qosýǵa múddeli
ASTANA. Jeltoqsannyń 11-i. QazAqparat /Marlan Jıembaı/ - QR Mádenıet jáne aqparat mınıstrligi barlyq memlekettik telearnalardy kábildi telearna toptamasyna qosýǵa múddelilik tanytyp otyr. Bul jaıynda atalǵan mınıstrliktiń Aqparat jáne muraǵat komıteti tóraǵasynyń orynbasary Áshir Aıtqalıev málim etti,
dep habarlaıdy QazAqparat.
Búgin elordada «Qazaqstandaǵy kábildi telearna: problemalary jáne sheshimderi» atty konferentsııada osyndaı pikir bildirgen onyń aıtýynsha, komıtet kábildi operatorlardyń memlekettik arnalardy qosa usynýyna qatysty máselelerdi sheshýge qadam jasaýda.
Osy maqsatta mınıstrlik kábildi telearnalarda memlekettik baǵdarlamalardyń qosylýyn esepke alatyn toptamalar qurýǵa baǵyttalǵan qaýly jobasyna bastamashy bolyp otyr.
«Bul qaýlyny kelesi jyldyń birinshi toqsanynda qabyldaıdy degen úmitimiz bar. Sonymen qatar taratý jelisine óńirlik arnalardyń qosylýy da osy eki sharýashylyq sýbektiniń basty máselesi bolyp tabylady. Bul jaıttar ózara tıimdi yntymaqtastyq sheńberinde sheshilýi qajet», deıdi Á.Aıtqalıev.
Mınıstrliktiń málimetteri boıynsha, búgingi tańda Qazaqstanda 257 elektrondyq BAQ jumys isteıdi. Onyń 147-si kábildi telearna operatorlary. Jalpy kábildi telearna ınfraqurylymy Aqmola, Almaty jáne Qaraǵandy oblystarynda jaqsy damyǵan.
Alqaly jıyndy Mádenıet jáne aqparat mınıstrliginiń memlekettik-áleýmettik tapsyrysy boıynsha Teleradıohabarlaryn taratý ulttyq qaýymdastyǵy uıymdastyryp otyr. Sharanyń negizgi maqsaty - kábildi telearnalardyń zańnamalyq jáne normatıvtik bazasyn jetildirý boıynsha usynystar men usynymdar daıyndaý.
