Mádenıet jáne aqparat mınıstri «Habar», «Qazaqstan» ulttyq arnalary respýblıka aýmaǵyn tolyq qamtýyna qatysty tapsyrma berdi
A. Qarashanyń 18-i. QazAqparat /Qanat Mámetqazyuly/ - Búgin Elbasynyń tikeleı jelide ótkizgen suhbatynda berilgen tapsyrmalardy talqylaýǵa arnalǵan alqa májilisi barysynda QR Mádenıet jáne aqparat mınıstri Muhtar Qul-Muhammed Aqparat jáne muraǵat komıtetine «Habar»,
«Qazaqstan» ulttyq arnalary respýblıka aýmaǵynda tolyq qamtylýyna baılanysty arnaıy tapsyrma berdi, dep habarlaıdy QazAqparat.
«Elbasynyń tikeleı efır barysynda júktegen mindetterine sáıkes, Úkimetke, mınıstrlikterge bergen sharalarynyń oryndalýyn kórsetý maqsatynda «Arna-medıa» holdıngine arnaıy tapsyrma beriledi. Sonymen birge, Memleket basshysynyń tikeleı jelide kótergen máselelerine jáne Elbasynyń atyna kelip túsken saýaldarǵa qatysty arnaıy jumys jospary bekitiletin bolady. Bul baǵytta eń aldymen Aqparat jáne muraǵat komıtetine arnaıy tapsyrma júktelinedi. Komıtet Qazaqstandaǵy «Habar» men «Qazaqstan» ulttyq arnalaryn kóre almaı otyrǵan eldi mekenderdi anyqtaýy tıis. Ondaı óńirlerge ulttyq arna ónimin jetkizý úshin qandaı sharalar atqarýy kerektigi boıynsha arnaıy zertteýler júrgizýi kerek. Aǵymdaǵy jyldyń jeltoqsan aıyna deıin bul týraly naqty baıandalýyn suraımyn», dedi mınıstr.
Sonymen birge, mınıstr búgingi elektrondy aqparat quraldaryndaǵy jaǵdaıǵa toqtala kele, bul salada otandyq ónimniń mólsheri artyp otyrǵanyn jetkizdi. Onyń aıtýynsha, qazirgi kúni qazaqstandyq elektrondy aqparat quraldarynda 60 paıyzdan kem bolmaıtyndaı otandyq ónimder qamtylyp otyr. Bul rette elimizdegi jetekshi ulttyq arnalar halyqqa 90 paıyzǵa jýyq ózderiniń ónimderin usynýda.
