Mádenıet jáne aqparat mınıstri eldiń shyǵarmashyl odaqtary basshylarymen kezdesti
ALMATY. 17 naýryz. QazAqparat - Bul kezdesýdiń maqsaty - ortaq qyzmettiń odan ári formatyn pysyqtaý jáne pikir alysý boldy. Bul týraly búgin Almatyda eldiń shyǵarmashyl odaqtary basshylarymen kezdesýde QR Mádenıet jáne aqparat mınıstri Darhan Myńbaı málim etti.
Kezdesý barysynda QR-niń mádenıet saıasatyn júzege asyrý úderisinde mádenıet jáne aqparat mınıstrligi men shyǵarmashyl odaqtardyń birlesken jumysyn uıymdastyrý máseleleri talqylandy. Sondaı-aq Memleket basshysynyń Joldaýynda aıtylǵan mindetterdi júzege asyrý jónindegi birlesken qyzmettiń keleshegi talqylandy. Shyǵarmashylyq odaqtardy patrıottyq tárbıe jumystaryn damytýǵa, qazaqstandyqtardy rýhanı jáne mádenı tárbıeleý salasyn damytýǵa baǵyttalǵan jobalardy júzege asyrýǵa belsendi tartý bastamalary kóterildi.
«Shyǵarmashyl odaqtar kóptegen qyzmetkerlerdi, talantty adamdardy biriktiredi jáne olardy bastaýynda árqashan da shyǵarmashyl tulǵalar turady. Búgingi ústeldiń basyna jınalǵandardyń aınalasyna shyǵarmashylyq elıta birigýi tıis, olardan halyq jańa týyndylar kútedi», - dedi mınıstr.
Shyǵarmashyl odaqtardyń basshylary mınıstrlik tarapynan árdaıym qoldaý kórsetilip, shyǵarmashyl zııaly qaýymmen yntymaqtastyqty damytýǵa umtylys bolyp otyrǵanyn atap óte otyryp, vedomstvo basshysynyń bastamalaryn qoldady jáne ony júzege asyrýǵa belsene qatysýǵa ázir ekendikterin bildirdi.
Sharaǵa Qazaqstandaǵy mýzyka jáne teatr qaıratkerleriniń, jazýshylar men aqyndardyń, kompozıtorlardyń, kınematografısterdiń, sýretshilerdiń, dızaınerlerdiń, horeograftar men sáýletshilerdiń basyn qosyp otyrǵan iri toǵyz shyǵarmashyl birlestikterdiń basshylary - qazaqstandyq mádenıettiń belgili qaıratkerleri Ermek Serkebaev, Nurlan Orazalın, Tuńǵyshbaı Jamanqulov, Balnur Qydyrbek, Igor Vovnıanko, Baıtursyn Ómirbekov, Tımýr Súleımenov, Dúısenbek Naqypov, Aqmyrza Rústembekov qatysty.
