Mádenıet jáne aqparat mınıstri Aıda Balaeva Sankt-Peterbýrgte otandastarymyzben kezdesti
Mádenıet jáne aqparat mınıstri Aıda Balaeva Sankt-Peterbýrgqa jumys saparymen bardy. Sapar aıasynda qazaqstandyqtarmen jáne qalanyń shyǵarmashylyq ıntellıgentsııa ókilderimen kezdesti, dep habarlaıdy Kazinform.
Vedomstvo basshysy Sankt-Peterbýrgtyń shyǵarmashylyq ıntellıgentsııasyna aınalǵan otandastarymyzben jeke tanysyp, olarmen yntymaqtastyqtyń keleshegi bar birlesken baǵyttary men jobalardy talqylady.
Sonymen qatar mınıstr búkil álemge esimi tanymal opera ánshisi Álııa Kıkenovany «Shapaǵat» medalimen marapattady. Marapattaý týraly Jarlyqqa Qazaqstan Prezıdenti Qasym-Jomart Toqaev qol qoıǵan bolatyn jáne ol elimizdiń Respýblıka kúnine arnalǵan edi. Álııa Kıkenovaǵa memlekettik nagrada elimizdiń táýelsizdigin damytýǵa jáne nyǵaıtýǵa qosqan zor úlesi úshin tabystaldy.
«Meniń shyǵarmashylyǵym men qoǵamdyq qyzmetimdi joǵary baǵalap, nazar aýdarǵany úshin Qazaqstanǵa shyn júrekten rızashylyǵymdy bildiremin. Men bul isti úlken yntamen jalǵastyryp, elimizge qaltqysyz qyzmet etetin bolamyn», - dedi Álııa Kıkenova.
Shyǵarmashylyq ıntellıgentsııa ókilderine júgingen vedomstvo basshysy elimizdiń Mádenıet jáne aqparat mınıstrligi Qazaqstan mádenıetin, onyń ishinde ádebıet, mýzyka, kórkem óner men kınematografııany tanytý úshin úlken jumys istep jatqanyn atap ótti. 2024 jyly Qazaqstannyń sheteldik alańdardaǵy Mádenı kúnderin, kórmeler, kontsertter, sheberlik klastaryn ótkizý josparlanyp otyr.
«Biz úshin tájirıbeniń almasqany mańyzdy. Jazýshylar, sýretshiler men ártister bir-birimen aralasyp, myǵym qarym-qatynas qalyptastyrýy qajet. Integratsııa osyndaı adamı ózara qarym-qatynas esebinen tereńdeýi tıis. Bul óz jumysyńdy kórsetý úshin de jaqsy múmkindik», - dep atap ótti Aıda Balaeva.
Mınıstr Reseıde turaqty turatyn otandastarymyzdyń Qazaqstan qalalary sahnalary men kórme alańdarynda óner kórsetý múmkindigin alýyna, qazaqstandyq aýdıtorııany shyǵarmashylyqtarymen tanystyrýǵa kómek berýge daıyn ekendigin basa aıtty.
Kezdesýge ómiri men shyǵarmashylyǵy Qazaqstanmen baılanysty qazaqstandyq jáne reseılik mádenıet jáne óner qaıratkerleri qatysty: Reseıdiń eńbek sińirgen sýretshisi, Reseı Jaratylystaný akademııasynyń akademıgi Latıf Qazbekov, Marıın teatrynyń jetekshi solısi Avgýst Amonov, músinshi, «Erarta premııa» halyqaralyq konkrsynyń jeńimpazy Temirlan Teleshov, Marıın teatry orkestiriniń solısi Aqan Meıirbekov, Reseı Sýretshiler odaǵynyń múshesi, Sankt-Peterbýrg ónerkásiptik tehnologııa jáne dızaın ýnıversıtetiniń dotsenti Sábıt Nurymov qatysty.
Búgin Mádenıet mınıstri IX Mádenıet forýmyna qatysady. Onda 70-ten astam eldiń ókilderi mádenıet pen óner salasyndaǵy ózara is-qımyldyń ózekti máselelerin talqyǵa salatyn bolady.
