Mádenıet uıymdarynyń qyzmetkerleri medıtsınalyq maska tigý aktsııasyn bastady
NUR-SULTAN. QazAqparat – El óńirlerindegi mádenıet uıymdarynyń qyzmetkerleri medıtsınalyq maska tigý aktsııasyn bastap ketti, dep habarlaıdy QazAqparat tilshisi.
«Jumyla kóterip, talaı júkti jeńildetkenbiz. Bul synaqtan da eldegi birlik pen kelisimniń arqasynda súrinbeı óterimizge senemin. Qazir tutas jer-jahandy teńseltken koronavırýsqa qarsy naýqanǵa árkim qolynan kelgenshe úles qosyp jatyr. Bizdiń mınıstrlikke baǵynyshty bilim berý mekemeleriniń jataqhanalary indetpen kúreske bel sheship kirisken dárigerlerdiń, quqyq qorǵaý organy qyzmetkerleri men áskerılerdiń jumylǵan jumysyna tamshydaı úles qosýda. Elimizdegi indetke qarsy kúresten biz de shet qalmadyq. Mınıstrlikke qarasty respýblıkalyq mádenıet uıymdary 21-naýryzdan aýrýhanalarǵa, qalanyń áleýmettik mekemelerine jáne óz qyzmetkerleri úshin medıtsınalyq maska tigý aktsııasyn bastady», - dedi Mádenıet jáne sport mınıstri Aqtoty Raıymqulova OKQ-da ótken baspasóz máslıhatynda.
Máselen, búgingi kúni mádenıet uıymdary óz kúshimen barlyq sanıtarlyq-gıgıenalyq normalardy saqtaı otyryp, 15 myńnan astam kóp ret qoldanylatyn maskany tıisti uıymdarǵa tapsyrǵan. Sonymen qatar, óńirlik mádenıet uıymdary da osy aktsııaǵa qosylyp, 20 myńnan astam maska tikken.
«Sonymen qatar, mınıstrlikte baǵynyshty uıymdar materıaldyq jaǵdaıy tómen azamattarǵa azyq-túlik dári-dármek, materıaldyq kómek kórsetip keledi. Búgingi brıfıngte sózimdi aq halatty abzal jandarǵa alǵys aıtýdan bastadym. Qazir dárigerlerge aqyndarymyz óleń arnap, kompozıtorlarymyz, tipti mamandyqtary ónerden alys adamdar da qoldap, óz týyndylaryn shyǵaryp jatqandyǵyn túrli aqparat quraldarynan, áleýmettik jelilerden estip, kórip júrsizder. Osy kúrdeli synaqty kezeńde elimiz aýyzbirshilik sabyrlyq arqasynda barlyq qıynshylyqtardan birge eńseretinimizge senimdimin!» - dedi ol.
