«Mádenıet» telearnasynyń kórermendermen qaýyshqanyna 2 jyl toldy
ASTANA. 26 qyrkúıek. QazAqparat - Búgin «Mádenıet» telearnasynyń efırge shyqqanyna 2 jyl toldy.
Qazaqstandyq kórermenderge otandyq jáne álemdik mádenıet jaýharlaryn keńinen tanystyratyn arna 2011 jyldyń 26 qyrkúıeginde «Qazaqstan» RTRK AQ janynan ashylǵan edi.
Eki jyl ýaqyt aralyǵynda telearna qazaqstandyq kórermenderdiń kóńilinen shyǵyp úlgerdi. Qazirgi kezde telearna jurtshylyqqa «Júzdesý», «Kitaphana», «Áli esimde...», «Kókjıek», «Altyn kómbe», «Órkenıet», «Sol jyldar...», «Raskrytaıa partıtýra», «Neslýchaınye vstrechı», «Legendy ı mıfy Opernogo», «Ǵasyrlar pernesi», «Qylqalam», «Aqsaraı», «Mádenıet jańalyqtary», «Tarıh aınasy: ańyz ben aqıqat», «Imıa» jáne t.b baǵdarlamalaryn usynady.
Aqparat keńistigine qadam basqan alǵashqy jyldar jemisin berip úlgerdi. Máselen, «TEFI-Dostastyq» festıvalinde telearnanyń «Legendy ı mıfy opernogo» baǵdarlamasynyń Kúlásh Baıseıitova týraly sany júldeger atandy. TMD elderinen úzdik telebaǵdarlamalar tartysqa túsken bul baıqaýǵa 16 memleket qatysyp, 56 baǵdarlama usynyldy. Dárejesi joǵary dodadan arnanyń aldyńǵy orynnan kórinýi - úlken jetistik.
Qazaqstannyń tarıhı jáne mádenı murasyn saqtaý, tildik ortany damytý, rýhanı qundylyqtardy nasıhattaý, kórermenniń talǵamyn kóterý - telearnanyń basty maqsaty.
«Mádenıet», «Tarıh» jáne «Retro» sııaqty úsh arnany toǵystyra otyryp, ulttyq mádenıet pen ulttyq qundylyqtardy nasıhattaýdy basty nazarda ustaıdy. Sonymen qatar, arna jan-jaqty dúnıetanymyn arttyrý baǵytynda ázirlengen otandyq jáne sheteldik úzdik telehabarlar men derekti fılmderdi halyqqa usynýda.
Sondaı-aq, telearna efır ýaqytynyń 30 paıyzyn alatyn zamanaýı formatta jasalǵan tok-shoý, televızııaǵa arnalǵan mýzykalyq jáne dramalyq qoıylymdar, derekti jáne kórkem fılmder, telehıkaıalar, túrli janrdaǵy arnaıy jobalardy ázirleıdi.
Telearna jańalyqtaryn ǵalamtor jelisi arqyly da taratý jolǵa qoıylǵan. madeniettv.kz caıty ınternet qoldanýshylaryna barynsha jyldam, jedel aqparat taratýdy maqsat tutady, dep habarlaıdy «Qazaqstan» AQ» respýblıkalyq teleradıo kesheniniń baspasóz hatshysy Tanakóz Tolqynqyzy.
