«Mádenıet» telearnasy ashyldy

Búgin Astanada «Qazaqstan» telearnasynyń memlekettik tilge tolyq kóshýine, sondaı-aq «Balapan» telearnasynyń 1 jyldyǵyna jáne «Mádenıet» arnasynyń tusaýkeserine arnalǵan saltanatty sharada
QR Baılanys jáne aqparat mınıstri Asqar Jumaǵalıev "jańa «Mádenıet» telearnasy el táýelsizdigin nyǵaıtýǵa jáne memlekettik tildi damytýǵa óz úlesin qosa alady" degen pikirin bildirdi.

Jańa telearna búgin, qyrkúıektiń 26-synan bastap efırge shyǵyp, 80 paıyz memlekettik tilde jáne 20 paıyz ózge tilderde habar taratatyn bolady. «Mádenıet» arnasyn ashýdyń negizgi maqsaty - kórermen qaýymdy otandyq jáne álemdik mádenıettiń nárimen sýsyndatý. Ol úshin jańa telearnada eń úzdik qazaq kınosy, Keńes odaǵy kezinde shyǵarylǵan kórkem týyndylar, derekti fılmder, álemdik kınomatografııanyń biregeı týyndylary, ataqty tulǵalardyń ómirbaıanyna arnalǵan baǵdarlamalar , opera jáne balet baǵdarlamalary, telespektaklder taǵy da basqa mádenı jobalar kórsetilmek.

Atap aıtqanda, «Aqsaraı», «Sol jyldar», «Órkenıet», «Qylqalam», «Ǵasyrlar pernesi», «Altyn kómbe», «Kitaphana», «Áli esimde» baǵdarlamalary, sondaı-aq «Abaı», «Qazaq dalasynyń qupııalary» sııaqty derekti fılmder kórermenge jol tartpaq.