Mádenıet, sport salasyndaǵy kolledj pedagogteriniń jalaqysy eki ese ósedi

NUR-SULTAN. QazAqparat – 2023 jylǵa deıin mádenıet jáne sport salasyndaǵy mektep pen kolledj pedagogteriniń jalaqysy jyl saıyn 25 paıyzǵa ulǵaıyp otyrady, dep habarlaıdy QazAqparat tilshisi.

«Mádenıet jáne sport qyzmetkerleriniń ál-aýqatyn arttyrý – bizdiń jumysymyzdyń negizgi baǵyttarynyń biri. Memleket basshysynyń Joldaýyn iske asyrý sheńberinde 2020 jyldyń 1 qańtarynan bastap mádenıet jáne óner uıymdary qyzmetkerleriniń jalaqysy respýblıkalyq deńgeıde 50%-ǵa, ol orta eseppen alǵanda 96 myńnan 139 myń teńgege deıin, óńirlerde 35%-ǵa, sáıkesinshe 96 myńnan 126 myń teńgege deıin ósti. Jalpy, mundaı ósim shamamen 34 myń adamdy qamtydy», - dedi Aqtoty Raıymqulova OKQ-da onlaın rejımde halyq aldynda esep berý kezdesýinde.

Mınıstr sondaı-aq, 2020 jyldyń basynan bastap kásiptik qyzmetin toqtatqan jáne kásibı eńbek ótili keminde 20 jyl bolatyn balet ártisterine aı saıyn sońǵy 3 jyldyq ortasha jalaqysynyń 60%-ǵa deıingi mólsherinde tólem berile bastaǵanyn jetkizdi.

«Budan basqa, Qazaqstandaǵy ádebıet jáne óner qaıratkerlerine, talantty jastarǵa memlekettik qoldaýdy kúsheıtý maqsatynda beriletin Tuńǵysh Prezıdent – Elbasynyń mádenıet salasyndaǵy stıpendııasy 240-tan 660 aılyq eseptik kórsetkishke deıin ulǵaıtyldy. Jyl saıyn ǵylym, mádenıet jáne óner salasyndaǵy daryndy jastar Qazaqstan Respýblıkasynyń Tuńǵysh Prezıdenti – Elbasy qory premııasynyń laýreaty atanyp keledi. Erekshe mártebesi bar mádenıet jáne óner salasyndaǵy joǵary oqý oryndarynyń professor-oqytýshylar quramyna laýazymdyq jalaqylarynyń mólsherine 1,75 koeffıtsıenti saqtalǵan», - dedi ol.

Sonymen birge mınıstrdiń aıtýynsha 2020 jylǵy 1 qańtardan bastap mádenıet jáne sport salasyndaǵy mamandandyrylǵan mektep jáne kolledj pedagogteriniń jalaqysy jyl saıyn 2023 jylǵa deıin 25 paıyzǵa ulǵaıyp otyrady. Naqtyraq aıtqanda ol eńbekaqy 2020 jyly 25 paıyzǵa, 2021 jyly 50 paıyzǵa, 2022 jyly-75 paıyzǵa, 2023 jyly-100 paıyzǵa ósedi.

Aıan Bekenuly