Mádenıet salasynyń qyzmetkerleri qosymsha tólem alady

TARAZ. QazAqparat – Qazaqstanda balet, bı ansamblderiniń, memlekettik tsırk artısteri men úrmeli aspaptar orkestrleriniń mýzykanttary aı saıyn áleýmettik kómek alady. Bul týraly Jambyl oblysynyń turǵyndarymen esep berý kezdesýinde Mádenıet jáne sport mınıstri Ashat Oralov aıtty, dep habarlaıdy QazAqparat Mádenıet jáne sport mınıstrligine silteme jasap.

Ortasha aılyq eńbekaqynyń 60 paıyzy mólsherindegi arnaıy aqshalaı tólemdi keminde 20 jyldyq kásibı eńbek ótili bar, kásibı qyzmetin toqtatqan sala ardagerleri alýǵa quqyly. Qazirgi ýaqytta elimizde osy sanattaǵy artısterdiń sany – shamamen 200 adam.

Arnaıy kómekti taǵaıyndaý Mádenıet jáne sport mınıstrliginiń bastamasymen sala qyzmetkerlerin áleýmettik jaǵynan qorǵaý jáne qoldaý maqsatynda zań jobasyna ózgetýler men tolyqtyrýlar engizýdiń nátıjesinde iske asty.

Atalǵan mamandardyń jumysy densaýlyq pen ómirge qaýip tóndirýmen baılanysty ekenin aıta ketý kerek. Olar turaqty fızıkalyq jáne psıhologııalyq júkteme jaǵdaıynda jumys isteıdi.

«Atalǵan másele jaıynda salalyq kásipodaq jıyndarynda, azamattardy qabyldaý kezinde, sondaı-aq halyqpen kezdesýler barysynda da jıi aıtylyp keldi. Belgili bir jasqa jetkende, fızıologııalyq jáne estetıkalyq sıpattaǵy erekshelikterge baılanysty kóptegen artıster zeınetkerlik jasty kútpesten kásipten ketedi. Sebebi, 20-25 jyldyq kásibı qyzmetten keıin kóp jaǵdaıda kásibı aýrýlarǵa ushyraıdy. Osyǵan baılanysty mınıstrlik sala ardagerlerin áleýmettik turǵydan qorǵaý maqsatynda aı saıynǵy arnaıy kómek taǵaıyndady», - dedi Mádenıet jáne sport mınıstri Ashat Oralov.