Mádenıet salasy narazylyqtar sherýine, aqparat salasy sottasý alańyna aınaldy – depýtat
ASTANA. KAZINFORM – Májilis depýtaty Qazybek Isanyń málimetinshe sońǵy 6 aıdyń ishinde mádenıet qaıratkerleri Memleket basshysy men Parlamentten kómek surap, 6 ret ashyq hat jazǵan.
«Keıingi bir jylda mádenıet salasy — narazylyqtar sherýine, aqparat salasy — sottasý alańyna aınaldy. Sońǵy 6 aıdyń ishinde mádenıet qaıratkerleri Memleket basshysy men Parlamentten kómek surap, 6 ret ashyq hat jazdy, ıaǵnı, aıyna bir hattan keledi. 12 qarashada eki Eńbek Eri — Asanáli Áshimov pen Dýlat Isabekov bastaǵan, halyq ártisteri men halyq jazýshylary qostaǵan áıgili mádenıet qaıratkerleri kıno salasyndaǵy qalyptasqan aýyr ahýalǵa narazylyq bildirip, memleket basshysynan jaǵdaıdy baqylaýǵa alýdy surap, taǵy da ashyq hat jazdy», — dedi Qazybek Isa Úkimet basshysy atyna depýtattyq saýal joldap.
Onyń aıtýynsha, ashyq hattardyń mazmuny kıno óndirisine jaýapty oryndarda salaǵa qatysy joq bógde adamdar otyr jáne jemqorlyq jaılaǵan kınoǵa bólingen mıllıardtaǵan teńge talan-tarajǵa túsip jatyr. Biraq ashyq hattar Prezıdentke qaıta-qaıta jazylyp jatsa da, Úkimet úndemeı otyra berýge úırengen.
«Mádenıet mınıstrligi ózderiniń qatelikterinen shyqqan daýdy tezirek sheshý ornyna, Prezıdentke talaı úndeý jasalyp jatsa da, sońǵy úndeýden beri on kúnnen assa da, mınıstr túgili, mınıstrliktiń bir ókili de «Qazaqfılmge» bas suqpaǵan áli. Bul mádenıetti qoldaýǵa basa nazar aýdaryp otyrǵan Prezıdent Qasym-Jomart Toqaevtyń ádiletti Qazaqstan saıasatyna qarsy jasalyp otyrǵan sabotaj emes pe?!», — deıdi ol.
Prezıdent pen Parlamentke jazylǵan hatta «Qazaqfılm» kınostýdııasynda da, Ulttyq kınony qoldaý ortalyǵynda — birde-bir kıno salasynyń mamany joqtyǵy jazylǵan.
«Mádenıet salasyna mádenıetten habary joq kim kóringendi basshy qylatyndaı mádenıet salalary, ulttyq kıno ekperıment jasaıtyn organ ba? Mádenıet jáne aqparat mınıstrligi elimizdiń ulttyq ıdeologııasy, ádebıeti men mádenıeti, óneriniń jetekshi ordasy emes pe? Kez kelgen salany qurtýdyń eń ońaı joly — ol jerge ol salaǵa esh qatysy joq adamdy bastyq qylý. Mamandyǵy kınoǵa úsh qaınasa sorpasy qosylmaıtyn, bir kún de kınoda istemegen, qazaq tilin qaqpaıtyn, bir de bir ret qazaq fılmin kórmegen adamdy «Qazaqfılmge» basshy qylýdaǵy mınıstrdiń maqsaty osylaı eldi shýlatyp, jumysty turalatý ma?», — dep shúılikti halyq qalaýlysy mınıstrge.
Sóz sońynda Qazybek Isa Úkimet atalǵan máselege shuǵyl aralasyp, jaǵdaıdy turaqtandyrýy tıis ekendigin aıtty.
