Mádenıet pen salt-dástúrler negizinde yntymaqtastyq ornatýǵa bolatynyn táýelsizdiktegi 20 jyldyq ómirimiz dáleldedi - E.Toǵjanov
ANA. 1 mamyr. QazAqparat /Gúlmıra Álıakparova/ - Mádenıet pen salt-dástúrler negizinde naǵyz yntymaqtastyqty ornatýǵa bolatynyn táýelsizdiktegi 20 jyldyq ómirimiz dáleldep berdi.
Bul oıyn búgin Astanada Qazaqstan halqynyń birligi kúni qurmetine oraı ótken merekelik shara barysynda jýrnalısterge bergen suhbatynda Qazaqstan halqy Assambleıasy Tóraǵasynyń
orynbasary Eraly Toǵjanov bildirdi.
E.Toǵjanovtyń aıtýynsha, bıyl 1 mamyr merekesin bastaǵan sherý, Qazaqstan halqyn odan ári uıystyrý úshin alǵash ótkizilgen jalǵyz shara emes.
«Jaqynda ǵana Astanada ulttyq teatrlardyń respýblıkalyq festıvali ótti. Memlekettik jáne oblystyq deńgeıdegi ulttyq teatrlar belgili dramatýrgtardyń úlken shyǵarmalaryn sahnalady. Teatr - ómirdiń aınasy dep aıtatyn bolsaq, dúnıede bolyp jatqan - adam men adam arasyndaǵy qarym-qatynasty, birliktiń tereń maǵynasy men mánin teatr arqyly da kórsetýge bolatynyna kóz jetkizdik», - dedi ol.
Assambleıa ókiliniń sózine qaraǵanda, 20 sáýirde bastalǵan osyndaı mán-mańyzdaǵy is-sharalar Qazaqstannyń túkpir-túkpirinde 4 mamyrǵa deıin uıymdastyrylatyn bolady. 4 myńnan astam sharaǵa barlyǵy 2 mln.-ǵa jýyq adam qatysýda.
«Olardyń ishindegi negizgisi - 1 mamyr kúngi merekelik sharalar. Sherýler - birlik qarym-qatynastarǵa, yntymaqtastyqqa tikeleı septigin tıgizetinine kámil senemin. Sebebi, is júzinde birge bola bilý, birge ómir súre bilý - ómirdegi eń úlken qundylyqtardyń biri. Búgin «Qazaq eli» monýmentiniń aldyndaǵy alańda 50 myńǵa jýyq adam jınaldy. Qalanyń aınalasyndaǵy 20 eldi mekende taǵy 50 myń adam merekelik sharalarǵa qatysýda. Mádenıet pen salt-dástúr negizinde naǵyz yntymaqtastyqty ornatýǵa bolatynyn táýelsizdiktegi 20 jyldyq ómirimiz dáleldep berdi», - dedi E.Toǵjanov.
Onyń pikirinshe, Qazaqstanda ulttardyń ózara tatýlyqta, yntymaqta ómir súrýi Qazaqtan Prezıdenti Nursultan Nazarbaevtyń osyndan 15 jyl buryn jasaǵan modeliniń jemisi.
