Mádenıet pen óner, ǵylym men biliminiń damýyna atsalysyp júrgen qor qurytaıshysy "Jyl uıymy" dep tanyldy
ALMATY. 28 qazan. QazAqparat /Erlik Erjanuly/ - "Baýyrjan" qaıyrymdylyq qorynyń "Jyl uıymy" atalymyndaǵy "Altyn júrek" syılyǵy bıyl "Altyn qyran" kompanııalar toby" JShS-ne berildi.
Ol asa iri qaıyrymdylyq jobalary men aktsııalardy qoldaǵany úshin, qaıyrymdylyq kómeginiń jańa tıimdi pishinderin engizip, qoǵamdaǵy mańyzdy sharalarǵa bas demeýshi bolǵany úshin zańdy tulǵalarǵa beriletin dástúrli marapat. Islambek Tóleýbaıuly basshylyq jasaıtyn kompanııa bıyl qańtar aıynda komertsııalyq emes "Altyn qyran" qoryn qurǵan bolatyn. Qordyń aldyna qoıǵan basty maqsattary - el mádenıeti, óneri, ǵylymy men biliminiń damýyna atsalysý. Qazaqstannyń atalmysh salalarǵa eńbegi sińgen qaıratkerlerine qoldaý kórsetý. Otansúıgishtikti, ulttyq salt-dástúr, tálim-tárbıe normalary men mádenı qundylyqtardy dáripteý. Memlekettik tildiń damýyna atsalysý. Qoǵamda salaýatty ómir salty, dene tárbıesi men sportty nasıhattaý. Turmysy nashar adamdarǵa, qarttarǵa, múgedekterge, jetim balalarǵa, jaǵdaıy joq oqýshylar men stýdentterge qol ushyn berý. Sondaı-aq talapty, talantty azamattardy el ishinen taýyp, kótermeleý bolyp tabylady.
«Altyn qyran» kompanııalar toby" JShS-i respýblıka kınoteatrlarynda 23 maýsymynan bastap kórsetile bastaǵan Ýolt Dısneı kompanııasy túsirgen «Kólikter-2» mýltfılminiń qazaq tilindeni nusqasyn dýblıajdaý jumysyna atsalysty. Oǵan resýrstyq, kadrlyq jáne qarjylaı kómek kórsetti. Astana qalasynda 27-sáýirde ótken «MýzART» tobynyń 10 jyldyq mereıtoılyq kontsertin jáne Almatyda 7-mamyra bolǵan dırıjer, skrıpkashy Ahan Meıirbekovtyń «Shekarasyz mýzyka» degen kontsertin ótkizýge qarjylaı kómek kórsetti. Qazaqstandyq «Bal-bala» brendi boıynsha shyǵarylǵan 715 oıynshyqty satyp alyp, ony jetim balalarǵa arnalǵan 6-respýblıkalyq «Tańsholpan» baıqaýynyń 180 qatysýshysyna, 31 memlekettik balalar baqshasy men Astana qalasyndaǵy SOS-qalashyǵynyń 405 balasyna taratty. Qazir QR Bilim jáne ǵylym mınıstrligimen birlesip respýblıkadaǵy 7500 mekteptiń qazaq tili muǵalimderi men oqýshylaryna ádistemelik qural esebinde DVD-tasymaldaýshy arqyly taratylatyn «Abaıdy oqy, erinbe» beınebaıandamalar toptamasyn daıyndap jatyr.
