Mádenıet nysandarynyń múlkin jalǵa berý tártibi ózgerýi múmkin

ASTANA. KAZINFORM — Memlekettik múlikti jaldaýǵa (jalǵa alýǵa) berý qaǵıdalaryn bekitý týraly buıryqqa ózgeris engizý jónindegi joba «Ashyq NQA» portalyna 19 naýryzǵa deıin qoǵamdyq talqylaýǵa shyǵaryldy. 

Atap aıtqanda, respýblıkalyq memlekettik mádenıet uıymdarynyń múlkin múliktik jaldaýǵa berý memlekettik múlik jónindegi ýákiletti organnyń quzyretinen alynyp tastalady. 

— Jobada memlekettik múlik jónindegi ýákiletti organmen respýblıkalyq memlekettik mádenıet uıymdarynyń múlkin múliktik jaldaýǵa berýdi alyp tastaý kózdeledi. Qazaqstan Respýblıkasy Mádenıet jáne aqparat mınıstrligi respýblıkalyq memlekettik mádenıet uıymdarynyń múlkin múliktik jaldaýǵa berý tártibin aıqyndaıtyn bolady, — delingen qujattyń túsindirme jazbasynda.

Sonymen qatar, qujatty qabyldaý memlekettik múlik jónindegi ýákiletti organnyń respýblıkalyq memlekettik mádenıet uıymdarynyń múlkin berýge qatysty ókilettigin alyp tastaýǵa múmkindik beredi.

Buǵan deıin de memlekettik múlik máseleleri jónindegi zań jobasy qoǵamdyq talqylaýǵa shyǵarylǵan edi. Ol jobamen memlekettik múlikti basqarýdyń bazalyq qaǵıdattary bekitiledi: aktıvterdiń tolyq jáne shynaıy esebin qamtamasyz etý, belgilengen ólshemderge sáıkes olardy ıelený, jekeshelendirý, qaıta uıymdastyrý jáne taratý arqyly básekelestik sektorlarǵa memlekettiń qatysýyn qysqartý, korporatıvtik basqarýdyń qazirgi zamanǵy standarttaryn engizý jáne eseptiliktiń ashyq júıesin qalyptastyrý kózdelgen bolatyn.