Mádenıet mınıstrliginiń qyzmetkerleri birkúndik eńbekaqylaryn koronavırýspen kúreske aýdardy
«Qazaqstan Respýblıkasynyń Mádenıet jáne sport mınıstrliginiń qyzmetkerleri birkúndik eńbekaqylaryn elimizdegi koronavırýstyń taralýyna qarsy kúreske kómek retinde aýdarýǵa sheshim qabyldady. Qazir koronavırýs indeti dúnıejúzin teńseltip tur. Talaı syndarly sátten, qınalǵan shaqtan eldegi aýyzbirshilik pen tatýlyqtyń arqasynda aman-esen shyqtyq. Bul synaqtan da muqalmaı, shyńdalyp shyǵarmyz!» - dep atap ótedi mınıstrlikten.
Vedomstvo baspasóz qyzmeti búgin Qazaqstannyń Tuńǵysh Prezıdenti Nursultan Nazarbaev el halqyna úndeý joldap, osyndaı aýyr kezeńde memlekettik deńgeıde qabyldanyp jatqan sharalar qazirgi qıyn ahýalǵa saı der kezinde qolǵa alynǵanyn aıtqanyna nazar aýdartady. Barlyq qazaqstandyqtardy el Prezıdenti Qasym-Jomart Toqaev pen Úkimet tarapynan iske asyrylyp jatqan shuǵyl sharalardy qoldaýǵa shaqyrǵanyn eske salady.
«Mádenıet jáne sport mınıstrligi elde qolǵa alynyp jatqan túrli saqtyq, aldyn alý sharalaryna ún qosyp, birkúndik eńbekaqylaryn elimizdegi koronavırýstyń taralýyna qarsy kúreske kómek retinde aýdardy. Jumyla kóterip, talaı júkti jeńildetkenbiz. Bul joly da sondaı aýyzbirshilikten aınymaıyq», - deıdi mınıstrlikten.
