Mádenıet mınıstrliginiń 20 mlrd teńgeni tıimsiz jumsaǵany anyqtaldy

NUR-SULTAN. QazAqparat – QR Mádenıet jáne sport mınıstrligi jumysynda 343 mln 900 myń teńgeniń qarjylyq buzýshylyq faktileri anyqtaldy. Mınıstrliktiń jekelegen bıýdjettik baǵdarlamalarynyń iske asyrylýy boıynsha júrgizilgen memlekettik aýdıttiń qorytyndysy boıynsha Esep komıtetiniń múshesi Talǵat Jaqan osylaı dedi, dep habarlaıdy QazAqparat tilshisi.

«Atap aıtqanda, mınıstrlik «Qazaq ulttyq horeografııa akademııasyna» 7,9 mln teńge kóleminde negizsiz qosymsha qun salyǵyn (QQS) aýdarǵan. Ol ýaqytta akademııa QQS tóleýshi bolmaǵan», - dedi Talǵat Jaqan.

Onyń aıtýyna qaraǵanda, mınıstrliktiń jumysynan taǵy birqatar kemshilik tabylǵan.

«Jalpy, aýdıtorlyq sharalar boıynsha 343 mln 900 myń teńgeniń qarjylyq buzýshylyq faktileri anyqtaldy. Oryndy jospardyń bolmaýynan 20 mlrd 600 mln teńge tıimsiz jumsalǵan. 846 mln teńgeniń memlekettik satyp alýy kezinde buzýshylyqtarǵa jol berilgen. 91 protsedýralyq buzýshylyq bolǵan. Aýdıt barysynda ornyna qoıylýy tıis 10 mln 900 myń teńgeniń buzýshylyqtaryn retteý boıynsha sharalar qabyldandy. 333 mln teńgeniń jumysy qalpyna keltirildi. 9 mln 700 myń teńge óteldi. 75 mln 400 myń teńge qaıtaryldy. Ákimshilik quqyqbuzýshylyq sıpaty bar 28 is ákimshilik óndiris isin qozǵaý úshin ýákiletti organǵa tapsyryldy», - dedi Talǵat Jaqan.