Mádenıet mınıstrligine úzdik fılmderdi qazaqshaǵa aýdarý tapsyryldy
«Mádenıet salasyn damytýda kıno ındýstrııanyń áleýeti zor. Sebebi, halyq arasynda tartymdylyǵyna baılanysty – kıno memlekettik mádenıet saıasatyn iske asyrýdyń pármendi quraly. Bizge kınonyń basty kórermeni sanalatyn jastar arasynda otansúıgishtikti, eńbekqorlyqty, otbasylyq qundylyqtardy, jaýapkershilikti, salaýatty ómir saltyn, bilim alýdy nasıhattaıtyn tartymdy kartınalar kerek. Mınıstrlik memlekettik bıýdjet esebinen túsiriletin fılmderdiń osy talaptarǵa sáıkes bolýyn qatań baqylaýǵa alýy kerek», - dedi A. Kólginov Mádenıet mınıstrliginiń alqa májilisinde.
Sonymen qatar, ol basqa da kommertsııalyq jobalardyń qoǵamdyq normalarǵa qaıshy bolmaýy mınıstrliktiń nazarynda bolýy tıis ekenin tapsyrdy.
«Qazir kórermen talǵamynyń óskenin baıqap otyrmyz. Sondyqtan, fılmderdi kórermen pikirin eskere otyryp, memlekettik bıýdjetten qarjylandyrý mehanızmin oılastyrý qajet. Bul rette fılmder monıtorınginiń biryńǵaı aqparattyq júıesin iske qosý mańyzdy. Osy aqparattyq júıe arqyly árbir fılmniń prokatyn onlaın-rejımde qadaǵalaýǵa múmkindik týady. Mundaı aqparattyq júıe kıno salasynyń damýyna óte qajet. Bul otandyq kıno naryǵyn damytýǵa oń áserin tıgizetin bolady», - dedi Úkimet basshysynyń orynbasary.
Osy oraıda, ol fılmderdi memlekettik tilde dýblıajdaý máselesine arnaıy toqtaldy.
«Mınıstrlik úzdik fılmderdi qazaq tiline aýdarý máselesin qolǵa alýy tıis. Jastar jáne balalar qyzyǵa tamashalaıtyn fılmderdiń qazaqshalanýy memlekettik tildiń qoldanys aıasyn keńeıtýge oń áserin tıgizetin bolady. Jalpy, kınoóndiris salasyn damytýda tıisti qaýymdystyqtarmen birlesken jumysty jandandyrý kerek. Osy oraıda, Memleket basshysy «Qazaqfılm» ulttyq kınostýdııasyn qazirgi zamanǵa saı modernızatsııalaýdy tapsyrdy. Bul baǵytta naqty josparlar jasalǵan, ony taǵy da pysyqtap, tııanaqty iske asyrýdy suraımyn», - dedi Altaı Kólginov.
