Mádenıet mınıstrligi – jazda jyljymaly kitaphanalar uıymdastyrylady

ASTANA. QazAqparat – Mádenıet jáne sport mınıstri Ashat Oralov Úkimet otyrysynda jazǵy demalys kezinde balalar teatrlary qalaı jumys isteıtinin aıtty, dep habarlaıdy QazAqparat tilshisi.

«Respýblıkalyq teatrlardyń repertýarynda jazǵy demalys kezinde «Sıqyrly tereze», «Týǵan kún», «Áripter álemine saıahat», «Oınaıyq jáne oılaıyq» «Kishkentaı Mýk», «Qyzyq pildiń shytyrman oqıǵasy» sııaqty spektaklder men qoıylymdardy kórsetý kózdelgen.

N.Sats atyndaǵy balalar teatrynda «SatsComUnity» balalar teatr stýdııasy jumys isteıtin bolady.

1 maýsym – Balalardy qorǵaý kúnine mádenıet uıymdary túrli formattaǵy merekelik is-sharalar daıyndady. Mysaly, Ǵ.Músirepov atyndaǵy teatrda «Kishkentaı hanzadanyń oralýy» spektakliniń tusaýkeseri ótedi», - dedi mınıstr.

Vedomstvo basshysy oqýshylardyń jazǵy demalysyn uıymdastyrý sharalarynan mýzeıler men kitaphanalar da shet qalmaıtynyn aıtty.

«Elimizdiń kitaphanalary men mýzeılerinde ekskýrsııalar, dárister jáne tanymdyq is-sharalar jalǵasady: belgili qazaqstandyq sýretshilerdiń, músinshilerdiń, ólketanýshylardyń, arheologtardyń qatysýymen plenerler, «BookCrossing» aktsııasy, al barlyq aýyldyq okrýgterde «Jyljymaly kitaphanalar» uıymdastyrylady.

R.Baǵlanova atyndaǵy «Qazaqkontsert» memlekettik kontserttik uıymy «Jazǵy kıno» biregeı jobasyn bastaıdy. Onyń sheńberinde klassıkalyq jáne anımatsııalyq fılmdermen qatar «Qazaqfılm» kınostýdııasy jáne Ulttyq kınony qoldaý memlekettik ortalyǵynyń kómegimen túsirilgen jańa kınokartınalar tegin kórsetiledi», - dedi Ashat Oralov.