Mádenıet mınıstrligi Táýelsizdiktiń 20 jyldyǵy men Saıası qýǵyn-súrgin qurbandaryn eske alý kúnine arnap birqatar sharalar ótkizedi
ASTANA. 27 mamyr. QazAqparat - QR Mádenıet mınıstrligi Qazaqstan Respýblıkasy Táýelsizdiginiń 20 jyldyǵy men 31-mamyr - Saıası qýǵyn-súrgin qurbandaryn eske alý kúnin atap ótý aıasynda Astana qalasy men el kóleminde birqatar mańyzdy sharalar ótkizedi.
Jazyqsyz japa shekken jandardy eske alýǵa arnalǵan is-sharalardyń birqatary mamyr aıynyń basynda bastalyp ta ketti. Taǵy bir legi 15 mamyrdan bastalyp, búgingi kúnge deıin jalǵasýda. Máselen, Astana qalasyndaǵy QR Ulttyq akademııalyq kitaphanada «Tarıh, ýaqyt jáne zaman» atty kórme ótti. 16 mamyrdan bastap, atalmysh kitaphana men oblystyq kitaphanalarda Mádenıet mınıstrligi men Qazaqstan halqy Assambleıasynyń birlesip uıymdastyrýymen «Toleranttyq, ǵylym jáne qoǵamdyq kelisim kúnderi» ótýde.
Al 30, 31-shi mamyr kúnderi Astanadaǵy jáne elimizdegi barlyq murajaılarda, kitaphanalarda saıası qýǵyn-súrgin qurbandaryn eske alýǵa arnalǵan taqyryptyq kórmeler men ekspozıtsııalar uıymdastyrylmaq.
Sondaı-aq, 31-shi mamyrda Aqmol aýylyndaǵy «ALJIR» totalıtarızm men saıası qýǵyn-súrgin qurbandaryna arnalǵan memorıaldyq-murajaıda gúl shoqtaryn qoıý rásimi men Ázerbaıjan elshiliginiń estelik taqtasynyń ashylýy ótedi. Osy kúni Astana qalasyndaǵy «Іsker» bıznes ortalyǵynda «HH ǵasyrdyń 20-30-shy jyldaryndaǵy Qazaqstandaǵy saıası qýǵyn-súrgin: tarıh jáne taǵdyr» atty ǵylymı-tájirıbelik konferentsııa bolady.
«Atalǵan sharalardan ózge, oblys, aýdan jáne aýyl ákimdikterinde murajaılar men memorıaldar aýlasyn tazalaý, gúl shoqtaryn qoıý, qarttarmen, qýǵyn-súrginge ushyraǵandardyń urpaqtarymen, saıasatkerlermen jáne tarıhshylarmen kezdesýler, suhbattar jáne dóńgelek ústelder uıymdastyrylatyn bolady», - delingen vedomstvo baspasóz qyzmetiniń taratqan habarlamasynda.
