Mádenıet mınıstrligi: Qazaqstannyń latynǵa kóshýi boıynsha memkomıssııanyń qurylatyndyǵy asyǵys jarııalandy
ASTANA. 30 naýryz. QazAqparat - Qazaqstannyń latynǵa kóshýi boıynsha memkomıssııanyń qurylýy týraly aqparat merziminen erte jasaldy.
Bul týraly Tengrinews.kz tilshisine QR Mádenıet jáne aqparat mınıstrliginiń Til komıtetinen málim etti.
«Taıaýda birqatar BAQ Mádenıet jáne aqparat mınıstrliginiń Til komıtetine silteme jasap, aǵymdaǵy jyldyń kúzinde latyn grafıkasyna kóshý boıynsha memlekettik komıssııa qurylatyndyǵy týraly aqparat taratty. Buǵan qosa, qazirgi ýaqytta komıssııany qurý jáne qandaıda bir merzim týraly aıtýǵa erte. Atalǵan másele boıynsha qabyldanǵan sheshim BAQ-ta resmı jarııalanady. Búginde tek bul mindetti sheshýdegi tujyrymdamalyq tásilderdi aıqyndaý boıynsha ǵylymı-sarapshylyq qoǵamnyń jumysy týraly ǵana aıtýǵa bolady. Naqty aıtqanda, qazaq álipbıiniń ǵylymı-lıngvıstıkalyq máseleleri A.Baıtursynov atyndaǵy til bilimi ınstıtýty ǵalymdarymen qarastyrylýda. Másele ońaı emes, barlyǵy da tyńǵylyqty oılastyrylǵan bolýy tıis. Búgingi kúnge deıin sarapshylar men ǵalymdar arasynda álipbı boıynsha biryńǵaı kózqaras joq», - dedi QR MAM Til komıteti tóraǵasynyń orynbasary Sherýbaı Qurmanbaıuly.
Esterińizge sala keteıik, 2013 jyldyń 1 qyrkúıeginde qazaq álipbıin latyn grafıkasyna kóshirý boıynsha memlekettik komıssııanyń qurylatyndyǵy týraly 28 naýryzda QR Parlamenti Májilisiniń áleýmettik-mádenı damý komıtetiniń otyrysynda depýtat Aldan Smaıyl málim etken bolatyn. «Biz Úkimetke depýtattyq saýal joldadyq jáne biz alǵan jaýapta memlekettik komıssııanyń 2013 jyldyń 1 qyrkúıeginde Prezıdent Jarlyǵymen qurylatyndyǵy aıtylǵan», - degen edi A.Smaıyl.
