Mádenıet mınıstrligi elde 20-ǵa jýyq arhıv ǵımaratyn salýdy josparlap otyr
Búgin Mádenıet jáne sport mınıstrliginiń mádenıet, arhıv jáne baspa isi salalaryna arnalǵan alqa otyrysy ótti. Osyǵan qaraı, Mádenıet jáne sport mınıstri Ashat Oralov mınıstrliktiń tarapynan osy ýaqytqa deıin atqarylǵan jumystary men bolashaq josparlary týraly óziniń Facebook paraqshasynda jazdy, dep habarlaıdy QazAqparat.
Qurmetti dostar!
Búgin Mádenıet jáne sport mınıstrliginiń mádenıet, arhıv jáne baspa isi salalaryna arnalǵan alqa otyrysy ótti.
Keńeıtilgen jıynǵa Premer-mınıstriniń orynbasary Altaı Kólginov, Parlament depýtattary, zııaly qaýym ókilderi, sala mamandary qatysty. Jıynda mádenıet pen arhıv salasynda atqarylyp jatqan jumystar jóninde baıandalyp, aldaǵy maqsat-mindetter saralandy.
Ózderińizge málim, Memleket basshysy Qasym-Jomart Toqaevtyń tapsyrmasyna sáıkes Mádenı saıasatty damytý tujyrymdamasyn ózektendirý jumystary mınıstrlik tarapynan kezeń-kezeńimen júrgizilip keledi.
Atap aıtqanda, mádenı saıasatty damytý tujyrymdamasynyń jobasynda Ulttyq joba men Prezıdenttiń Saılaýaldy baǵdarlamasyndaǵy kórsetkishter ıntegratsııalanyp, halyqaralyq tájirıbege sholý jasalyp, mádenı saıasattyń basym baǵyttary qamtylyp otyr.
«Osy oraıda byltyr qolǵa alynǵan, alda júzege asyratyn irgeli isterdiń birqataryn osy jerde tarqatyp aıta ketkim keledi.
Barshamyzǵa málim, byltyr «Ulttyq» mártebesi bar mádenıet uıymdary qyzmetkerleriniń jalaqysy eki esege jýyq ósken bolatyn. Atalǵan nysandar tizimi aldaǵy ýaqytta da keńeıtilýi kerek»,-dedi Ashat Oralov.
Onyń sózine, sonymen qatar, shyǵarmashylyq joǵary oqý oryndaryndaǵy kontsertmeısterler, sondaı-aq úrmeli mýzykalyq aspaptarda oınaıtyn memlekettik mádenıet uıymdarynyń qyzmetkerleri, bı ansambli ártisteriniń ál-aýqatyn kóterý josparlanyp otyr. Bul oraıda zańnamalyq aktilerge tıisti ózgerister engizý jumystary bastalyp ketti.
Sondaı-aq elimizdiń arhıv qoımalaryna qatysty birqatar másele bar, olar nazardan tys qalmaıdy. Mınıstrlik aldaǵy ýaqytta 500 myń saqtaý birligine arnalǵan 20-ǵa jýyq Memlekettik arhıv ǵımaratyn salýdy usynyp otyr. Bul bastama vedomstvoaralyq jumys pen úılestirýdi talap etedi.
Odan bólek, elimizdiń tarıhyna qatysty arhıv qujattaryn shetelden aldyrý jumystary qarqyndy jalǵasatyn bolady. Bul qatarda arheologııalyq zertteýler men tarıhı eskertkishterdi qalpyna keltirý jumystaryn da aıryqsha ataı ketkenimiz jón.
Ózderińizge málim, Qazaqstanda vızıt ortalyqtar sany jyl sanap artyp keledi. Olardyń qataryna bıyl «Ordabasy», «Saýran», «Saraıshyq» jáne «Esik» vızıt ortalyqtary qosylatyn bolady.
Tarıhı-mádenı muradan bólek, mınıstrlik ulttyq ádebıetimizdi qoldaý boıynsha da keshendi jumystardy atqarýda. Atap aıtqanda, bıyl jas jazýshylar men aqyndarǵa arnalǵan Prezıdenttik ádebı syılyq taǵaıyndalatyn bolady.
Sondaı-aq mádenıet qyzmetkerleriniń halyqaralyq forýmyn uıymdastyrý josparda bar. Bul qatarda «Aıboz» ulttyq ádebı syılyǵyn, «Jańa qazaq ádebıeti» jobasyn erekshe aıta ketýimizge bolady.
Alqa májilisinde sondaı-aq, Sh.Aımanov atyndaǵy elimizdiń eń iri kınostýdııasy jańǵyrtylatyny sóz etildi. Odan bólek, otandyq teatr ǵımarattaryn salý jáne qalpyna keltirý jumystary júrgiziledi.
Sonymen qatar bıyl ónerimiz ben mádenıetimizge qaltqysyz qyzmet etken birneshe tulǵamyzdyń ǵasyrlyq mereıtoıyn eskere otyryp, «Taǵylymǵa toly ǵasyr» atty arnaýly jobasyn usyndyq. Onyń aıasynda birtýar qaıratkerlerimizdiń rýhanı murasyn dáriptep, nasıhattaýymyz kerek. Bul qalyń kópshiliktiń mádenı ıgiligine jaraıtyn izgi jobaǵa aınalady dep senemin.
«Jalpy aldymyzda turǵan aýqymdy mindetter az emes. Josparly jumystardyń barlyǵyna jaýapkershilikpen qarap, úılesimdi is qyla alsaq, alynbaıtyn asý, baǵynbaıtyn beles joq dep oılaımyn.
Alqaǵa qatysqan barlyq áripteske alǵys bildirigim keledi»,-dedi mınıstr.
Foto: facebook.com/Ashat Oralov
