Mádenıet mınıstrligi «El ishi - óner kenishi» atty respýblıkalyq televızııalyq halyq shyǵarmashylyǵy baıqaýyn jarııalady

Baıqaýǵa oblystardyń, Almaty men Astana qalalarynyń kórkemónerpaz shyǵarmashylyq ujymdary men 15-35 jas aralyǵyndaǵy jeke oryndaýshylar qatysa alady.

Baıqaýdyń maqsaty men mindetteri:

- jańa daryndardy anyqtaý jáne talanttarǵa, ózindik erekshelikteri bar shyǵarmashylyq ujymdar men oryndaýshylarǵa qoldaý kórsetý;

- talantty adamdarǵa qoldaý kórsetýge jáne olardyń shyǵarmashylyq qabiletin damytýǵa jaǵdaı jasaý;

- turǵyndardyń jalpy mádenı deńgeıin kóterý;

- turǵyndardyń mádenı bos ýaqytyn jáne estetıkalyq tárbıe alýyn uıymdastyrý;

- mádenı aýmaqtaǵy memlekettik saıasatty júzege asyrý;

- Qazaqstan halqy mádenıetin jandandyrý, saqtaý, damytý jáne taratý;

- jastardyń ultjandylyq tárbıe alýyna, olardyń ulttyq jáne álemdik mádenıet qundylyqtarymen tanysýyna yqpal etý.

Baıqaý tómendegi atalymdar boıynsha ótedi:

• 1. mýzyka jáne bı;
• 2. teatr óneri jáne orıgınaldyq janr;
• 3. beıneleý jáne sándik-qoldanbaly óner.

Baıqaý aımaqtardaǵy suryptaý kezeńinen qurastyrylyp, Astanada ótkiziletin gala-kontsertpen aıaqtalady jáne BAQ-tarda jarııalanady.

Baıqaý ústimizdegi jyldyń mamyr-qarasha aılary aralyǵynda ótkiziledi.

Baıqaýǵa qatysýǵa ótinishti jergilikti jerlerdegi mádenıet basqarmalary qalyptastyryp, baıqaýdyń ótkizilý merzimi men orny týraly aqparatty Mádenıet jáne aqparat mınıstrligine 2012 jyldyń mamyr aıyna deıin usynady.

Qatysýshylardyń shyǵarmany oryndaý uzaqtyǵy 3-5 mınýttan aspaýy kerek. Eń úzdik ujymdar men oryndaýshylar Astanada ótetin qorytyndy gala-kontsertke qatysady. Baıqaýdyń jeńimpazy ádilqazy alqasynyń sheshimi boıynsha gala-kontsertte anyqtalady.

Baıqaý týraly tolyq maǵlumatty Qazaqstan Respýblıkasynyń Mádenıet jáne aqparat mınıstrliginiń saıtynan (www.mk.gov.kz ) alýǵa bolady.