Mádenıet mınıstrligi Dımash jaıynda: Ol Qytaıǵa kezdeısoq túse qalǵan joq
Áleýmettik jelide Qazaqstanda mádenıet jáne sport ónerpazdaryna shetelde tanymaldylyqqa qol jetkizgennen keıin ǵana memlekettik deńgeıde kóńil bóline bastaıtyndyǵy týraly kóp aıtylýda. Bul ýájge qatysty QR Mádenıet jáne sport vıtse-mınıstri Aqtoty Raıymqulova jaýap berýge tyrysty.
«Men bumen kelispeımin, sebebi Dımash birneshe márte qazaqstandyq baıqaýlarda da jeńimpaz atanyp júrdi. Ol úkimettik kontsertterdiń barlyǵyna da qatysyp keldi. Bizge tipti «basqalary qaıda, biz olardy shaqyryp edik qoı?!» dep ózge ánshilerdiń de shaqyrylýyn suraǵan kezder boldy. Biz Dımashty ár kezde de jyljytyp, halyqqa kórsetýge tyrystyq. Ol dástúrli estradanyń sińip qalǵan qalybynan ózgeshe ánshi», - dedi ol Úkimette ótken baspasóz máslıhatynda.
Onyń atap ótkenindeı, Dımash Qudaıbergen Qazaq ulttyq óner ýnıversıtetinde eń úzdik ustazdardyń qol astynda tárbıelenip jatyr. Óner ýnıversıtetinde de, mınıstrlikte de, kásipqoı ánshiler de Dımashty árdaıym qoldap otyrýǵa tyrysty. «Solardyń aqyldarymen ol «Slavıan bazary» syndy halyqaralyq baıqaýlarǵa qatysyp, ol jerden jeńimpaz atandy. Ózine tán eńbekqorlyǵy men talanty ony úlken jetistikterge jeteleı bermek», - dep sanaıdy vıtse-mınıstr.
«Ol Qytaıǵa kezdeısoq bara qalǵan joq. Qazaq ulttyq óner ýnıversıteti, mınıstrlik ony bul baıqaýlarǵa qarjylyq jáne shyǵarmashylyq turǵyda daıyndady. Sondyqtan Qazaqstan brendin jyljytýda biz tys qalmaımyz. Bul sportshy, mádenıet, óner, teatr, mýzyka adamy bolsyn - báribir. Bastysy, biz talantty adamdarymyzdy qoldaýǵa ázirmiz», - dep túıdi oıyn Aqtoty Raıymqulova.
