Mádenıet mınıstrligi bıyldan bastap qazaq tiliniń úlken termınologııalyq sózdigin jasaýǵa kirisedi

Búgin QR Parlamenti Májilisinde ótip jatqan «Memlekettik til - el birliginiń kepili» atty ǵylymı konferentsııa barysynda baıandama jasaǵan QR Mádenıet mınıstri Muhtar Qul-Muhammed osylaı málim etti, dep habarlaıdy QazAqparat.

Mınıstrdiń aıtýynsha, bul úlken sózdik eki jyldyń kóleminde aıaqtalyp, basylyp shyǵady. «Bul bizdiń qazaq tiliniń qoldanysynda bar búkil termınderdi qamtyp, árqaısysy 130-140 baspa tabaq bolatyn eki úlken entsıklopedııalyq tom formatynda basylady dep kútilip otyr. Sol úshin qolda bar termınniń bári osyǵan jınaqtalyp, engiziledi. Al ondaı jınaqtalǵan termınderdi Elbasynyń Jarlyǵymen, ne bolmasa Úkimettiń qaýlysymen bekitip, barlyq aqparat quraldaryna, barlyq mekemelerde birdeı qoldanatyn, qabyldanatyn termınologııalyq sózdik bolady», dedi M. Qul-Muhammed.