Mádenıet mınıstrligi «Ál-Farabı jolymen» halyqaralyq ekspedıtsııasyn uıymdastyrady

NUR-SULTAN. QazAqparat – Ábý Nasyr ál-Farabıdiń 1 150 jyldyǵy aıasynda Mádenıet jáne sport mınıstrligi «Ustazdyń oralýy» derekti fılmin túsirip, elimizdiń barlyq mýzeıi men kitaphanasynda taqyryptyq kórme ótkizýdi josparlap otyr, dep habarladıy QazAqparat tilshisi.

«Kúni keshe Almaty qalasynda «Álemniń ekinshi ustazy» Ábý Nasyr ál-Farabı babamyzdyń 1 150 jyldyq mereıtoıyn bastaýdyń rásimi halyqaralyq deńgeıde ótti. Qazaq ulttyq ýnıversıtetinde «Ábý Nasyr ál-Farabı atyndaǵy ortalyq» ashyldy. Bul rette bıylǵy jyly atap ótetin mańyzdy is-sharalar barysynda ysyrapshyldyq pen naýqanshyldyqqa jol berilmeıtindigine basa nazar aýdarǵym keledi», - dedi Mádenıet jáne sport mınıstri Aqtoty Raıymqulova mınıstrliktiń keńeıtilgen alqa otyrysynda.

Mınıstr sondaı-aq, «Ál-Farabı jolymen» halyqaralyq ekspedıtsııasyn uıymdastyrý, Sırııadaǵy Damask qalasynda ornalasqan «Ál-Farabı» kesenesiniń makettik kóshirmesin Túrkistan oblysyndaǵy Otyrar mýzeı-qoryǵynyń aýmaǵynda ornatý máselesi qosymsha pysyqtalyp jatqanyn aıtyp ótti. Budan bólek ǵalym týǵan Oqsyz qalashyǵynyń arheologııalyq jáne ǵylymı zertteý josparlanyp otyr.