Mádenıet mınıstrligi 31 tomdyq termınologııa sózdigin shyǵarýdy qolǵa aldy

Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda «Memlekettik tildi damytýdaǵy problemalar týraly» máseleni talqylaý barysynda Mádenıet jáne aqparat vıtse-mınıstri Arman Qyryqbaev málim etti.

Vıtse-mınıstrdiń aıtýynsha, sońǵy ret mundaı basylym 1999-2000 jyldary jaryqqa shyqqan. «Sodan beri qazaq termınologııasynyń bazasy birshama keńeıdi. Qazirgi ýaqytta 100-den astam ǵalym jańa termınologııalyq basylym shyǵarý baǵytynda jumys jasaýda. Osy jyly sózdiktiń alǵashqy 10 tomyn ázirleý jumysyn aıaqtaýdy josparlap otyrmyz. Kelesi jyly qalǵan 21 tomyn shyǵaramyz», - deıdi A. Qyryqbaev. 

Onyń aıtýynsha, atalǵan ónimdi ázirleý salalyq ǵalymdar men fılolog mamandardyń birlesken jumysynyń jemisi bolmaq. «Basylymnyń árbir tomy Memlekettik termınologııalyq komıssııasy tarapynan bekitiledi. Bul óz kezeginde sózdikke normatıvtik aktiniń statýsyn jáne jalpyǵa mindetti sıpatyn bildiredi», - dedi vıtse-mınıstr.