Mádenıet mınıstrligi jýrnalıst Indıra Jylqaıdarovanyń qazasyna baılanysty kóńil aıtty
ASTANA. KAZINFORM — QR Mádenıet jáne aqparat mınıstrligi belgili jýrnalıst Indıra Jylqaıdarovanyń dúnıeden ótýine baılanysty otbasy men týǵan-týystaryna, jaqyndary men áriptesterine qaıǵyryp kóńil aıtady.
Indıra Orynbaıqyzy 2015 jyldan bastap «Habar» agenttiginde eńbek etip, sońǵy jyldary «Habar» telearnasynyń «Jeti kún» baǵdarlamasynda redaktor-taldaýshy qyzmetin atqardy.
Ol parlamenttik jýrnalıstıkaǵa, qoǵamdyq-saıası máseleler men elimizdiń zań shyǵarý úderisin aqparattyq turǵydan jarııa etýge aıryqsha den qoıdy. El ómirindegi mańyzdy oqıǵalardy tereń taldap, ózekti máselelerdi kórermenge jedel ári shynaıy jetkizýge úles qosty.
— Indıra Orynbaıqyzy óz isine adaldyǵymen áriptesteriniń qurmetine bólendi. Onyń jýrnalıstıka salasyndaǵy eńbegi kásibı baıqaýlarda da joǵary baǵalandy. Qazaq jýrnalıstıkasynda ózindik qoltańbasyn qaldyrǵan ardaqty jannyń jarqyn beınesi týǵan halqynyń jadynda máńgi saqtalady dep senemiz. Marqumnyń jany jánnatta jaı taýyp, ımany salamat, jatqan jeri jaryq, topyraǵy torqa bolsyn! — delingen habarlamada.
Eske salsaq, keshe jýrnalıst jýrnalıst Indıra Jylqaıdarovanyń dúnıeden ozǵanyn jazǵanbyz. BAQ ókili sońǵy jyldary aýyr dertpen kúreskeni belgili boldy.
