Mádenıet mınıstrligi kreatıvti ındýstrııany damytýdyń basym baǵyttaryn atady
ASTANA. KAZINFORM – Bıyl Mádenıet jáne aqparat mınıstrligi BUU Damý baǵdarlamasymen birge «kreatıvshilerdi», sarapshylar men óńirlik ókilderdi belsendi tarta otyryp, kreatıvti ındýstrııa salasyna jan-jaqty saraptama jasaýdy josparlap otyr.
Saraptama qorytyndysynda aǵymdaǵy jaǵdaıdy, jahandaný men álemdik trendterdi eskere otyryp, 2024-2029 jyldarǵa arnalǵan Qazaqstan Respýblıkasynyń Kreatıvti ındýstrııany damytýdyń jańa baǵdarlamasy ázirlenedi.
Mádenıet jáne aqparat mınıstrligi agenttik tilshisiniń resmı saýalyna bergen jaýabynda kreatıvti ındýstrııany damytýdyń basym baǵyttaryn atady.
Kreatıvti ındýstrııany damytýdyń basym baǵyttary:
Óńirlik erekshelik. Kreatıvti ekonomıkanyń basym túrlerin bólý úshin árbir óńirge saraptama júrgizý jáne biregeı qajettilikterin anyqtaý. Bul árbir jergilikti jerdiń áleýetin paıdalanýǵa jáne myqty jaǵyn damytý úshin jaǵdaı jasaýǵa múmkindik beredi.
Zańnamalyq qoldaý. Kreatıvti ındýstrııany yntalandyrýǵa jáne qoldaýǵa, olardyń damýy úshin qolaıly quqyqty orta qalyptastyrýǵa baǵyttalǵan «Kreatıvti ındýstrııany qoldaý jáne damytý máseleleri boıynsha keıbir zańnamalyq aktilerge ózgertýler men tolyqtyrýlar engizý týraly» Zań qabyldaý.
Qarjylyq quraldardy qalyptastyrý. «Kreatıv haby» halyqaralyq ortalyǵy» korporatıvtik qoryn jáne kreatıvti ındýstrııa salasyndaǵy daryndardy qarjylandyrý ári qoldaý úshin ınvestıtsııalyq tetikter qurý.
Infraqurylymdyq damý. Infraqurylymdar men alańdardy qamtamasyz etý úshin óńirlerdi kreatıvti habtar men ortalyqtar qurý. Bul jerlerde daryndy jastar óz ıdeıalaryn júzege asyryp, tájirıbe almasady, jobalaryn júzege asyrady.
Strategııalyq josparlaý. Kreatıvti ındýstrııany damytýdyń uzaq merzimdi strategııasyn jasaý úshin 2024-2029 jyldarǵa arnalǵan Qazaqstan Respýblıkasynyń Kreatıvti ındýstrııany damytýdyń jańa baǵdarlamasyn ázirleý jáne bekitý.
Іlgeriletý jáne is-sharalar. Tájirıbe almasý, ózekti máselelerdi talqylaý, ındýstrııanyń áleýetin anyqtaý jáne qoldaý maqsatynda Memleket basshysynyń, kreatıvti ındýstrııa ókilderiniń qatysýymen halyqaralyq forým ótkizý.
Bilim jáne halyqaralyq yntymaqtastyq. Kreatıvti ındýstrııa salasyndaǵy bilim júıesin damytý, salanyń sapasyn jáne básekege qabilettiligin arttyrý maqsatynda tájirıbe almasý úshin halyqaralyq sarapshylardy tarta otyryp, mamandardy oqytý jáne daıyndaý.
«Mundaı keshendi sharalar tek kreatıvti ındýstrııa ósimin yntalandyryp qana qoımaı, daryndy adamdarǵa qolaıly jaǵdaı jasaıdy, ekonomıkany damytýǵa septigin tıgizip, álemdik aýqymda eldiń básekege qabilettligin arttyrady», - dedi mınıstrlikten.
