Mádenıet mınıstrligi kınoteatrlarǵa tekserý uıymdastyra ala ma – Balaeva jaýaby

ASTANA. KAZINFORM – Damyǵan elder deńgeıinde kınonyń qoljetimdiligin qamtamasyz etý úshin 1 500-den astam kınozal qajet. Bul týraly Májilis depýtattarynyń saýalyna Premer-mınıstrdiń orynbasary – Mádenıet jáne aqparat mınıstri Aıda Balaevanyń jaýabynda aıtylǵan.

– Mınıstrliktiń fýnktsııalarynda jeke kásipkerlik sýbektileri sanalatyn kınoteatrlardyń qyzmetin baqylaý jónindegi ókilettik joq. Sondaı-aq Kásipkerlik kodeksine sáıkes kásipkerlik sýbektileriniń menshigine qol suǵylmaýshylyq qaǵıdatyna kepildik beriledi jáne memlekettiń kásipkerlik sýbektileriniń isterine zańsyz aralasýyna tyıym salynady. Osyǵan baılanysty mınıstrlik kınoteatrlarǵa keshendi tekserýdi uıymdastyra almaıdy, - dedi vıtse-premer.

Onyń dereginshe, búginde elimizde 404 kınozaly bar 100-ge jýyq kınoteatr jumys isteıdi. Al damyǵan elder deńgeıinde kınonyń qoljetimdiligin qamtamasyz etý úshin qajettilik 2 000 zalǵa baǵalanady.

– Kınoteatrlardyń basym kópshiligi iri qalalarda ornalasqan jáne óńirlerde, shaǵyn qalalar men aýyldarda joq. Sońǵy 5 jylda otandyq fılmderge degen joǵary suranysqa qaramastan zaldar sany ósken joq, - dedi ol.

Vıtse-premer málimetinshe, jylyna elimizdiń kınoteatrlarynda 400-ge jýyq fılm kórsetiledi. Onyń ishinde 2021 – 31, 2022 – 60, 2023 – 79, 2024 – 94, 2025 103 Qazaqstan kınosy bar.

– Frantsııada (68 mıllıon halqy bar) shamamen 7 000 kınoteatr jumys isteıdi. Orta eseppen 10 myń turǵynǵa 1 zaldan keledi. Olar qurylysty memlekettik qoldaýdyń arqasynda osyndaı deńgeıge qol jetkizilgen, - dedi Aıda Balaeva.

Buǵan deıin Qazaqstannyń Antalııadaǵy bas konsýldyǵynyń bastamasymen, Qazaqstan Mádenıet jáne aqparat mınıstrligi men Sháken Aımanov atyndaǵy «Qazaqfılm» kınostýdııasynyń qoldaýymen qazaq kınosynyń kúnderi Antalııada ótkenin jazǵan edik.