AQSh-tyń jańa tarıfi Qazaqstan eksportynyń 95 paıyzyna áser etpeıdi – mınıstrlik
ASTANA. KAZINFORM – Saýda jáne ıntegratsııa mınıstrligi AQSh-tyń Qazaqstan taýaryna jańa tarıfine qatysty málimdeme jasady.
Mınıstrlik 2025 jyldyń 7 shildesinde AQSh Prezıdentinen bıylǵy jyldyń 1 tamyzdan bastap birqatar elge, onyń ishinde Qazaqstanǵa qatysty jańa ımporttyq bajdar engiziletini týraly resmı habarlama kelip túskenin atap ótedi. Qazaqstannan AQSh-qa eksporttalatyn ónimder úshin jetkizilimderdiń barlyq kólemine 25 paıyzdyq biryńǵaı mólsherleme belgilengen.
– Alaıda, qazaqstandyq eksporttyń basym bóligi – munaı, ýran, kúmis, ferroqorytpa, tantal jáne tıtan sııaqty negizgi shıkizat pen strategııalyq taýarlar – jańa tarıfterdiń qoldanystan alynýyna baılanysty jańa bajsyz jetkizilýin jalǵastyra beredi. Qabyldanǵan sharalar Qazaqstan eksportynyń shamamen 95 paıyzyna áser etpeıdi dep kútilýde, - dep atap ótedi vedomstvodan.
Qazaqstandyq taýarlarǵa boljamdy saýda rejımin saqtaý maqsatynda QR Úkimeti AQSh ákimshiligine ózara saýda sharttaryn jaqsartý jónindegi naqty sharalar men bastamalardy joldady. Qazaqstan maqsaty – naryqqa qol jetkizý jáne saýda sharttary máseleleri boıynsha kelisilgen sheshimder qabyldaý.
– Amerıka taraby Qazaqstan usynystaryn qarastyrýda jáne kelissózderdi ótkizý kúni týraly habarlaıdy. Qazaqstan ulttyq múddelerin qorǵaý jáne turaqty saýda-ekonomıkalyq áriptestikti damytý maqsatynda Amerıka tarapymen odan ári kelissózder júrgizýge daıyn, - dedi mınıstrlikten.
Aıta keteıik, Qazaqstan men AQSh arasyndaǵy taýar aınalymy 2024 jyly 4,2 mlrd AQSh dollaryn qurady. Bul onyń aldyńǵy jylmen salystyrǵanda 4 paıyzǵa joǵary (4,1 mlrd AQSh).
Qazaqstannan AQSh-qa eksporttyń negizgi taýarlary: shıkimunaı – 1,1 mlrd AQSh dollary (úlesi 56,2%), ýran – 322,9 mln.E AQSh dollary (16,4%), kúmis – 239,9 mln AQSh dollary (12,2%), ferroqorytpalar – 188,2 mln AQSh dollary (9,5%), tantal jáne odan jasalǵan buıymdar – 17,6 mln AQSh (0,89%) jáne t.b.
Qazaqstan men AQSh arasyndaǵy taýar aınalymy 2025 jylǵy qańtar-mamyrda 1 265,8 mln AQSh dollaryn qurady. Sol aralyqta Qazaqstannan AQSh-qa eksport 418,2 mln AQSh dollary boldy.