Mádenıet mınıstrligi Kenesary hannyń basy ornalasqan jer týraly pikir bildirdi

ASTANA. KAZINFORM — Senattyń kýlýarynda jýrnalıster mádenıet jáne aqparat vıtse-mınıstri Aıbek Sydyqovtan Kenesary hannyń basy qaıda bolýy múmkin jáne onyń Qazaqstanǵa qaıtarylý yqtımaldyǵy bar ma dep surady, dep habarlaıdy Kazinform tilshisi.

— Bul suraqqa dál qazir naqty jaýap berý qıyn. Óıtkeni Kenesary hannyń basy naqty qaı jerde ekenin aıta almaımyz. Bizde ondaı naqty, dáleldi aqparat joq, — dedi ol.

BAQ ókilderi artefaktiniń mádenı mańyzdylyǵyn eskere otyryp, ony izdeý jumystary júrgizilip jatyr ma dep surady. Vıtse-mınıstr zertteýlerdiń áli jalǵasyp jatqanyn habarlady.

— Bul tek Kenesary hannyń basyna qatysty emes. 2004–2006 jyldary jáne keıingi kezeńderde mádenı murany izdestirýge arnalǵan arnaıy memlekettik baǵdarlamalar boldy. Bizdiń ǵalymdar shetelge shyǵyp, mýzeılerde, arhıvterde, kitaphanalarda jumys istedi. Kóptegen arhıvtik qujattardyń kóshirmesi Qazaqstanǵa jetkizildi, — dedi ol.

Aıbek Sydyqovtyń aıtýynsha, tek «Arhıv–2025» baǵdarlamasy aıasynda sońǵy jyldary shetelde 14 myńnan astam arhıv birligi tsıfrlandyrylyp, Qazaqstanǵa ákelingen.

Buǵan deıin Astanada Kenesary han eskertkishin qalpyna keltirý jumystary aıaqtalǵany habarlanǵan.