Mádenıet mınıstrligi Ermek Tursynovtyń elden ketýine qatysty: Bul — onyń jeke sheshimi

ASTANA. KAZINFORM — Mádenıet jáne aqparat mınıstrligi qazaqstandyq kınorejısser Ermek Tursynovtyń elden shetelge kóshýine qatysty pikir bildirdi. 

— Ermek Tursynovtyń shetelge ketýine qatysty biz túsinikteme bere almaımyz, óıtkeni bul onyń jeke sheshimi, Konstıtýtsııa oǵan quqyq beredi. Iá, memleket árdaıym Ermek Tursynovty qoldap keldi, kóptegen fılm túsirildi, jobalar «Qazaqfılm» aıasynda da, ulttyq kıno ortalyǵy aıasynda da júzege asyryldy. Aldaǵy ýaqytta da qoldaýǵa daıyn bolatyn, biraq bul onyń tańdaýy, — dep jaýap berdi Ǵanı Muratov BAQ ókilderiniń saýalyna.

Osy oraıda mınıstrlik ókili Konstıtýtsııa ár azamatqa sóz ben shyǵarmashylyq erkindigine kepildik beretinin taǵy eske saldy.

— Ol kontsertter ótkizdi, kitaptar jazdy. Mysaly, oǵan kitap basýǵa nemese kontsert ótkizýge tyıym salynǵanyn men estigen joqpyn. Ótken jyly ol kóptegen shyǵarmashylyq kesh ótkizdi. Barlyǵy tynysh ótti, eshkim tyıym salǵan joq, — dep tolyqtyrdy basqarma basshysy.

Onyń aıtýynsha, bıyl Ermek Tursynov Ulttyq kıno ortalyǵyna úsh jobanyń stsenarıin usyndy.

— Demek, ol qatysyp jatyr. Biz eshqandaı tyıym kórip turǵan joqpyz, — deıdi Ǵanı Muratov.

Eske salaıyq, ótken jyly Mádenıet jáne aqparat mınıstrligi Ermek Tursynov 500 mln teńge alyp, kıno túsirmegen degen málimdeme jasaǵan edi. 

Aıta keteıik, 18 mamyrda Antıkor Ermek Tursynovtyń elden ketýine baılanysty pikir bildirdi.