Mádenıet mınıstrine Shıelidegi kóshege Rýslan Bólebaıdyń atyn berý ótinishi jasaldy

ASTANA. QazAqparat - Alan Besen esimdi azamat blog arqyly QR Mádenıet jáne sport mınıstri Arystanbek Muhamedıulyna jazǵan hatynda Qyzylorda oblysyndaǵy Shıeli kentindegi kóshelerdiń birine jýrnalıst Rýslan Bólebaıdyń esimin berýge járdemdesýdi surady.

Alan Besen óz hatynda 2016 jyldyń 17 shildesinde R. Bólebaıdyń kólik apatynan qaza bolǵanyna 7 jyl tolatyndyǵyn aıta kele, jýrnalıst juldyzdaı jarq etip, joq bolǵanyn, sondaı-aq 25-ke de jetpeı, elge keń tanylyp úlgergen jýrnalıst ekenin atap ótken.

«Qurmetti Arystanbek Muhamedıuly! «Turaqty damý» Jer qorynyń, jastar uıymdarynyń, Qazaqstan Respýblıkasynyń mádenıet jáne jýrnalıstıka qaıratkerleriniń  atynan Rýslan Bólebaıdyń týǵan eldi mekeni Shıeli kentindegi kóshege, saıabaqqa onyń atyn berý múmkindigin qarastyrýdy suraımyn",-delingen A. Besennniń ótinishinde.

Óz kezeginde mınıstr tilder týraly zańnamaǵa sáıkes,  eldi mekenderdegi kóshelerge Qazaqstanǵa jáne álemdik qoǵamdastyqqa eńbegi sińgen tanymal memleket jáne qoǵam qaıratkerleri, ǵylym men mádenıet qaıratkerleriniń esimderi beriletindigin atap ótken.

Sonymen qatar ol «Qazaqstan Respýblıkasynyń ákimshilik-aýmaqtyq qurylymy týraly» Zańy boıynsha kóshe ataýyn ózgertý oblystyq onomastıkalyq komıssııanyń qorytyndysy negizinde aýyldyń, kenttiń, aýyldyq okrýg ákiminiń sheshimimen múmkin bolatyndyǵyn jetkizdi.

«Osyǵan baılanysty bul ótinishti jergilikti atqarýshy organdarǵa joldaýdy suraımyz. Sonymen qatar Rýslan Bólebaıdyń atymen kósheni ataý týraly Sizdiń usynysyńyz Qyzylorda oblysynyń ákimdigine baǵyttaldy. Olar óz kezeginde zańnamaǵa sáıkes, qarastyryp, tıisti sharalardy qabyldaıdy»,-dep atap ótken mınıstr.