Mádenıet mınıstri ulttyq kıno óndirisimizde ilgerileýshilik bar dep esepteıdi
ASTANA. Qyrkúıektiń 23-i. QazAqparat /Ernur Aqanbaı/ - Mádenıet mınıstri Muhtar Qul-Muhammedtiń pikirinshe, elimizdiń ulttyq kıno óndirisinde ilgerileýshilik bar. Ol bul pikirin búgin Astanada ótken Mádenıet mınıstrliginiń keńeıtilgen alqa májilisinde bildirdi.
«2004, 2005 jáne 2006 jyldary elimizde 1 jylda 1-2 fılm shyǵatyn. Tipti synaıtyn da fılmder joqtyń qasy edi. Qudaıǵa shúkir, qazir jurt synaıtyn fılmder de túsirilip jatyr. Eger shyqqan fılmdi jurt syn tezine alady eken, ol fılm jóninde pikirtalas órbıdi eken, demek týyndynyń arǵy jaǵynda birdeme bar degen sóz», dedi alqada M. Qul-Muhammed.
Onyń aıtýynsha, kıno prokattaǵy otandyq fılmderdiń úlesi artyp keledi. Bul rette qazaq kınematografııasynda jastary 20 men 40-tyń arasyndaǵy rejısserlerdiń qatary kóbeıýde. «Ásirese 30-ǵa tolmaǵan jastardyń fılm túsire bastaýy qýantady», dedi mınıstr.
Deıturǵanmen, M. Qul-Muhammed otandyq kıno ındýstrııasynda kemshilikter de az emestigine toqtala kele: «Aldaǵy ýaqytta elimizdiń kıno óndirisi tıisti deńgeıde damıdy dep oılaımyn», dedi.
«Qazaqfılmniń aǵymdaǵy jylǵy taǵy bir jetistigi Elbasynyń halyqaralyq deńgeıdegi qyzmeti jóninde 9 fılm túsirdi. Bul buryn-sońdy bolmaǵan dúnıe. Elimizde kezinde «Qazaqtelefılm» deıtin derekti fılm túsiretin kıno stýdııa bolǵan. Ol qazir quryp ketti. Búgingi tańda ártúrli telearnalarda derekti fılm túsirýdi jolǵa qoıýdamyz. «Qazaqfılm» bıyldyń ózinde elimizge belgili óner, mádenıet sport jáne mýzyka qaıratkerler týraly, tipti zamandastarymyz jóninde de derekti fılmder túsirýge kirisip ketti. Bul óte durys», dedi mınıstr.
