Mádenıet mınıstri sport salasynyń ardagerleri men qyzmetkerlerin marapattady
Qazaqstan ortalyq kontsert zalynda elimizdiń sportshylary, sala ardagerleri men qyzmetkerleri Qurmet gramotalarymen jáne medaldarmen marapattaldy.
«Sport kúni biz halyqaralyq týrnırlerde elimizdiń namysyn qorǵaıtyn sportshylardyń, chempıondardy tárbıeleýge ýaqyt pen kúsh-jigerin jumsaıtyn jattyqtyrýshylar men sport uıymdary qyzmetkerleriniń, osy salaǵa ómirin arnaǵan ardagerlerimizdiń eńbegi men orasan zor úlesin atap ótemiz. Memleket basshysy Qazaqstanda buqaralyq sportty damytýǵa kóp kóńil bóledi, mınıstrlik osy salanyń qyzmetkerlerine barynsha qoldaý kórsetý úshin belsendi jumys jasap jatyr. Mysaly, biz sportshylardy daıarlaýdyń kelesi kezeńine berý jáne toptardy basqarý úshin jattyqtyrýshy-oqytýshylarǵa qosymsha tólem engizý boıynsha joba ázirledik», - dedi Mádenıet jáne sport mınıstri Ashat Oralov keshtiń ashylý saltanatynda.
Mınıstr otandyq sport ardagerlerine «Eńbek ardageri» medalin tabys etti, olardyń arasynda bokstan QR eńbek sińirgen jattyqtyrýshysy Marat Eleýsinov, bokstan QR eńbek sińirgen jattyqtyrýshysy Janat Manashev, 1972 jylǵy Olımpıadanyń kúmis júldegeri Vıktor Aboımov jáne basqa da tanymal sportshylar men jattyqtyrýshylar bar.
Sonymen birge, bokstan álem chempıony Mereı Aqshalov, Velosport federatsııasynyń bas hatshysy Ásem Qonaqbaeva, sport jýrnalısi Aslan Qajenov QR Premer-Mınıstriniń orynbasary Tamara Dúısenovanyń Alǵys hatymen marapattaldy.
«Dene shynyqtyrý men sportqa sińirgen eńbegi úshin» tósbelgileri 15 adamǵa tabystaldy. Olardyń ishinde túrli óńirlerden kelgen sportshylar, jattyqtyrýshylar men sport uıymdarynyń qyzmetkerleri bar.
Óz kezeginde «Cport salasynyń qurmetti qyzmetkeri» tósbelgisimen 12 adam marapattaldy.
Sonymen birge, QR Mádenıet jáne sport mınıstrliginiń Qurmet gramotasy jáne Alǵys hattary berildi. Osylaısha, aıtýly kún qarsańynda barlyǵy 250 adam qurmetke ıe boldy.
