Mádenıet mınıstri Qaraqat Bashanovanyń shyǵarmashylyǵyn jan-jaqty qoldaýǵa ázir ekenin aıtty

NUR-SULTAN. QazAqparat – Mádenıet jáne sport mınıstri Aqtoty Raıymqulova Junior Eurovision 2020 baıqaýynyń júldegeri Qaraqat Bashanovaǵa elorda ákimi bergen ýádeniń oryndalýyna yqpal etetinin aıtty, dep habarlaıdy QazAqparat tilshisi.

Ortalyq kommýnıkatsııalar qyzmetinde ótken brıfıngide Mádenıet jáne sport mınıstri Aqtoty Raıymqulovaǵa elorrda ákimi Altaı Kólginovtiń Junior Eurovision 2020 júldegerine bergen ýádesin oryndamaı júrgeni týraly suraq qoıyldy. BAQ ókiliniń aıtýynsha, ánshi qyzdyń ápkesi Nur-Sultan ákimi Qaraqat Bashanovaǵa fortepıano alyp berýge ýáde bergenimen, ol ýádesin áli oryndamaǵanyn málimdegen.

Mınıstr Qaraqat Bashanovanyń shyǵarmashylyǵyn jan-jaqty qoldaýǵa ázir ekenin aıtty.

«Qaraqat Bashanova – Kúlásh Baıseıitova atyndaǵy eń beldi respýblıkalyq mýzykalyq mekteptiń oqýshysy. Ózi birinshi synyptan beri osy mektepte oqıdy, Almaty oblysynda turady. Junior Eurovision baıqaýyna qatysqan kezde mınıstrliktiń qarjylaı kómekteskenin bilesizder. Konkýrsqa attanardan birneshe kún buryn men Qaraqatpen kezdesken bolatynmyn. Sol kezde onyń materıaldyq jaǵynan usynystary bolǵan joq. Usynys bolsa, qoldaýǵa ázirmiz», - deıdi Aqtoty Raıymqulova.

Mınıstr ánshige berilgen ýádelerdiń oryndalýyna yqpal etýge ázir ekenin de bildirdi.

«Árıne, ózimizdiń áriptesterimizge habarlasamyz. Jergilikti atqarýshy organdarǵa, sonyń ishinde Nur-Sultan qalasyndaǵy áriptesterimizge habarlasamyz. Bizdiń mınıstrlikte jas talanttardy qoldaıtyn bıýdjettik baǵdarlama bar. Osy bıýdjet aıasynda halyqaralyq konkýrstarǵa kóptegen jas ónerpazdarymyz qatysyp jatyr. Ol baǵytta da Qaraqatqa kómektesýge daıynbyz», - dedi vedomstvo basshysy.