Mádenıet mınıstri «Astana Opera» teatrynyń ujymyna jańa dırektordy tanystyrdy

ASTANA. QazAqparat - QR mádenıet jáne sport mınıstri Arystanbek Muhamedıuly búgin «Astana Opera» teatrynyń ujymyna jańa dırektory Tóleýbek Álpıevti tanystyrdy, dep habarlady atalǵan óner ordasynyń baspasóz qyzmeti.

Mınıstr Memleket basshysynyń atynan «Astana Opera» teatrynyń birinshi dırektory Tólegen Muhamedjanovqa «Astana Opera» teatrynyń álemge aty shyǵýyna sebepshi bolǵan jemisti jumysyna jáne úzdiksiz atqarǵan eńbegi men talantyna alǵys bildirdi.

Óz kezeginde Tólegen Muhamedjanov: «Maǵan úlken senim artyp, osy teatrdyń jumysyn bastaýynda qyzmet etýime múmkindik bergen elimizdiń prezıdentine rızashylyǵymdy bildiremin jáne meniń shyǵarmashylyqpen aınalyssam degen usynysymdy qabyldaǵanyna alǵysymdy aıtamyn. Biz barlyǵymyz ol kisige osyndaı marjandy - «Astana Opera» teatryn elimizge syılaǵany úshin rızashylyǵymyzdy bildirýimiz kerek».

Teatrdyń jańa basshysy Tóleýbek Álpıevti tanystyrý barysynda mınıstr teatr basshylyǵynyń birizdiligine senim arta otyryp, óner ujymyna úlken jetistik pen jańa belesterdi baǵyndyrýdy tiledi.

- Memleket basshysy aıtqandaı, «biz álemdik mádenıettiń qundylyǵymen tyǵyz baılanysta ári úndes bolatyn jańa dáýirdegi aldyńǵy qatarly qazaq mádenıetin qalyptastyrýǵa mindettimiz», - dep atap ótti mınıstr.

«Bizdiń aldymyzda úlken maqsattar tur - «Aıda» kúrdeli spektakli, odan keıin «Qaragóz» jáne «Shertkish» baletteriniń tusaýkeseri. Aldaǵy jyl da óte mańyzdy bolady. Bizdiń mádenıet pen ónerde qol jetkizgen jetistikterimiz zor, osy oraıda bizdiń ónerimiz mádenı úderistiń bir bóligine aınalýy tıis», - dedi óz ujymynyń aldynda sóz sóılegen Tóleýbek Álpıev.