Mádenıet mınıstri Almaty oblysyndaǵy kóne qalashyqtarda boldy
Vedomstvo basshysy qoryq-mýzeıdiń tynys-tirshiligimen jáne ondaǵy ǵalymdardyń halyqaralyq ǵylymı ekspedıtsııalary barysynda tabylǵan jádigerlermen tanysty. Sondaı-aq mınıstr Talhız, Rahat jáne Órikti kóne qalashyqtarynda bolyp, qazaqstandyq arheologtarmen kezdesti.
«Esik» qoryq-mýzeıi Qazaqstanda alǵashqylardyń biri bolyp ǵylymı jáne ǵylymı-tehnıkalyq jumys nysany retinde arheologııalyq zertteýler júrgizýge lıtsenzııa alyp, memlekettik akkredıtatsııadan ótken bolatyn. Dál osy Esik qorǵandary arasynda Qazaqstannyń baǵa jetpes arheologııalyq oljasy - «Altyn adam» tabylǵan bolatyn. 
Mınıstrdiń aıtýynsha, qazirgi tańda jergilikti bılikpen Talhız qalashyǵyn «Esik» qoryq-mýzeıi qaramaǵyna ótkizý máselesi qaralyp jatyr. «Eń birinshi kezekte jer-kadastrlik máselelerdi sheship alý kerek. Sondaı-aq biz tarıhı-mádenı nysandardyń týrısterge qoljetimdiligin, ınfraqurylymy men kommýnıkatsııalaryn jaqsartý jóninde áńgimelestik. Bul jerde týrısterge sapaly servıs kórsetetin vızıt-ortalyqtar salý qajet», - dep atap ótti Arystanbek Muhamedıuly.
Esterińizge sala keteıik «Esik» memlekettik tarıhı-mádenı qoryq-mýzeıi Elbasy tapsyrmasymen «Mádenı mura» baǵdarlamasy aıasynda 2010 jyldyń 30 qańtarynda qurylǵan bolatyn. Qazirgi tańda bul ǵylymı ortalyq túrli halyqaralyq uıymdarmen jáne arheologtarmen Almaty oblysy aýmaǵynda arheologııalyq zertteýler júrgizýde.
