Mádenıet komıtetiniń tóraǵasy taǵaıyndaldy
ASTANA. Aqpannyń 15-i. QazAqparat. Aqpannyń 15-de QR Mádenıet jáne aqparat mınıstri M.Qul-Muhammed ujymǵa Mádenıet komıtetiniń jańa tóraǵasyn tanystyrdy,
dep habarlaıdy QazAqparat.
Bul laýazymǵa osy Komıtet tóraǵasynyń orynbasary Qozybaev Іlııas Manashuly taǵaıyndaldy.
Іlııas Manashuly Qozybaev, 1957 jyly týǵan, qazaq. 1980 jyly Kırov atyndaǵy Qazaq memlekettik ýnıversıtetin «tarıh» mamandyǵy boıynsha bitirgen. Tarıh ǵylymdarynyń doktory, professor.
1982 jyldan bastap - ǵylymı jáne pedagogıkalyq jumystar atqardy. 1992-1993 jj. - Mınıstrler Kabınetine qarasty Joǵarǵy attestatsııalyq komıssııasynyń bólim bastyǵy. 1997-2009 jj. QR SІM júıesinde: mınıstrliktiń ortalyq apparatynda bólim men basqarma basshysy, QR-nyń Túrik Respýblıkasyndaǵy, Belarýs Respýblıkasyndaǵy, Venger Respýblıkasyndaǵy, Reseı Federatsııasyndaǵy elshilikterinde jumys istedi. 2000-2001 jj. QR Mádenıet, aqparat jáne qoǵamdyq kelisim mınıstrligi Arhıvterdi jáne qujattardy uıymdastyrý komıtetiniń tóraǵa orynbasary, 2006 - 2007 jj. QR Prezıdenti janyndaǵy Qazaq strategııalyq zertteýler ınstıtýtynda bas ǵylymı qyzmetker bolyp istedi. Júzden asa eńbekteri jarııalanǵan.
2009 jylǵy 1 qazannan bastap Qazaqstan Respýblıkasy Mádenıet jáne aqparat mınıstrligi Mádenıet komıtetiniń tóraǵa orynbasary bolyp taǵaıyndaldy.
