Mádenıet qaıratkerleri medıtsına kúnimen quttyqtady

Adamzattyń densaýlyǵy men ómiri úshin kún saıyn kúresip, ult bolashaǵy úshin aıanbaı etip júrgen dárigerlerdiń eren eńbegi qurmetke laıyq.

Ásirese pandemııa órship turǵan qazirgi qıyn kezeńde aq halatty abzal jandar naǵyz shydamdylyq pen tózimdilik, zor jaýapkershilik tanytyp, jankeshti eńbek etip júr.

Mártebeli maman ıelerine qoldaý kórsetip, rýhanı kúsh-jiger syılaý maqsatynda mádenıet pen óner qaıratkerleri áleýmettik jelilerde jańa beınerolık usyndy.

Bul erekshe beınerolık medıtsına qyzmetkerleriniń kásibı merekesine oraı jaryq kórdi. Osy arqyly QR Mádenıet jáne sport mınıstrligine qarasty«Qazaqkontsert» uıymynyń ánshileri men belgili óner juldyzdary aq halatty abzal jandarǵa alǵys bildirip, júrekjardy tilekterin jetkizdi.

Olardyń qatarynda Roza Rymbaeva, Naǵıma Esqalıeva, Maqpal Júnisova, Jeńis Seıdýllauly, Sáken Maıǵazıev, Janna Orynbasarova, Jubanysh Jeksenuly, Medeý Arynbaev, Erlan Rysqalı, Klara Tólenbaeva, Qurmash Mahan, Alısher Karımov, Dastan Orazbekov t.b. tanymal ánshiler bar.

Osyndaı beıne quttyqtaý ıdeıasyn bastaǵan «Qazaqkontsert» uıymynyń dırektory Jeńis Seıdýllauly dárigerler burynnan-aq meıirimdilik pen qamqorlyqtyń, eńbekqorlyqtyń sımvolyna aınalǵanyn jetkizdi. «Dáriger mamandary árdaıym syı-qurmetke laıyq dep bilemin. Aýrý janǵa batqan kezde dertke daýa, emge shıpa izdep, birden dárigerlerdiń kómegine júginemiz. Ásirese qazirgi ýaqytta kóp dárigerler aýrýhanada kúndiz-túni eńbek etip, vırýsqa qarsy tabandy kúres júrgizýde. Jaqsy sóz – jarym yrys demekshi, osylaısha dárigerlerge shyn alǵys pen ystyq yqylasymyzdy jetkize bilsek, olarǵa bul jaqsy qoldaý bolady dep senemin. Halyq densaýlyǵyn saqtaý jolynda bıik belesterge umtylǵan barsha dárigerlerge alǵysym sheksiz, - dep bólisti Jeńis Seıdýllauly.