Mádenıet qaıratkerleri barlyq qazaqstandyqtardy saılaýǵa belsendi qatysýǵa shaqyrdy
ASTANA. QazAqparat - Qazaqstannyń mádenıet qaıratkerleri barlyq qazaqstandyqtardy saılaýda daýys berýge shaqyrýda. Búgin elordadaǵy «Astana Opera» teatrynda ótken jıynda bir top mádenıet qaıratkerleri prezıdenttik saılaýǵa qatysty málimdeme jasady.
«Astana Opera» Opera jáne balet teatrynyń dırektory Tóleýbek Álpıev, málimdemede atap kórsetkenindeı, aldaǵy prezıdenttik saılaý - Qazaqstannyń jahandyq syn-qaterlerge jáne álemdik ekonomıkadaǵy daǵdarysqa qarsy jaýap retinde qolǵa alynyp otyrǵan mańyzdy qadam.
«Biz, mádenıet ókilderi, osynaý tarıhı sáttiń mánin, qazirgi zamannyń talaptary men qaýip-qaterlerin nazarǵa ala otyryp, barlyq qazaqstandyqtardy 26 sáýir kúni ótetin kezekten tys Qazaqstan Respýblıkasy Prezıdentin saılaýǵa qatysýǵa shaqyramyz. Kezekten tys prezıdenttik saılaý jahandyq, geosaıası jáne ekonomıkalyq oqıǵalarǵa jaýap retinde ótkizilgeli otyr. Búgin bizdiń memleket halyqaralyq qatynastardyń epıtsentrinde ornalasqan. Qazaqstannyń beıbitshilik jáne kelisim modeli BUU-nyń qabyrǵasynda, sonymen qatar ózge de álemniń birqatar elderinde talqylanýda. Toleranttylyq pen birlik - bizdiń mádenıetimizdiń ajyramas bóligine, jalpyulttyq «Máńgilik el» ıdeıasynyń basty qundylyǵyna aınaldy. Elimizdiń eń mańyzdy damý kezeńinde árbir azamat prezıdenttik saılaý naýqanynda óz daýystaryn berýleri tıis dep esepteımiz», - dedi Tóleýbek Álpıev.
