Mádenıet qaıratkerleri memlekettik stıpendııamen marapattaldy

ASTANA.KAZINFORM — Memlekettik keńesshi Erlan Qarın Qazaqstan Respýblıkasynyń Prezıdenti atynan mádenıet jáne óner qaıratkerlerine memlekettik stıpendııalardy tabys etti. Bul týraly Aqordanyń baspasóz qyzmeti habarlady. 

Jyl saıyn taǵaıyndalatyn stıpendııa – memlekettiń shyǵarmashylyq ókilderine, jas talanttarǵa degen erekshe kóńili men shynaıy qoldaýynyń aıqyn dáleli. Ári bul olardyń otandyq mádenıetti damytýǵa jáne halyqaralyq deńgeıde ilgeriletýge qosqan úlesin moıyndaý, laıyqty baǵalaý bolyp sanalady.

Osy jyly 75 adam memlekettik qoldaýǵa ıe boldy. Olardyń qatarynda Marfýǵa Aıtqoja, Oljas Súleımenov, Gennadıı Balaev, Aqushtap Baqtygereeva, Smaǵul Elýbaı, Shaıza Ahmetova, Altynshash Jaǵanova, Ǵabbas Qabyshuly, Tynymbaı Nurmaǵanbetov, Gúlnar Salyqbaeva, Qaırat Baıbosynov, Kamılla Lı, Doshan Joljaqsynov, Nurǵalı Núsipjan, Janǵalı Júzbaı, ıÝrıı Klýshkın jáne basqalary bar. Sonymen qatar opera ánshisi Marııa Mýdrıak, teatr aktrısasy Altynaı Nurbek, kıno jáne teatr akteri Bázil Sultanǵazy, aktrısalar Samal Eslıamova men Ekaterına Maksım jáne basqa da jas talanttar memlekettik stıpendııamen marapattaldy.

Memlekettiń qoldaý sharasy mádenıet qaıratkerleriniń kásibı sheberligin shyńdaýǵa, jańa ıdeıalar men jobalardy júzege asyrýǵa baǵyttalǵan.

Memlekettik keńesshi Erlan Qarın mádenıet jáne óner qaıratkerlerin júıeli qoldaý, mádenı ınfraqurylymdy odan ári damytý Prezıdent Qasym-Jomart Toqaev saıasatynyń negizgi basymdyqtarynyń biri ekenin atap ótti. Memlekettik qoldaý sharalary shyǵarmashylyqtyń órisin keńeıtip, eldegi mádenı tutastyqty nyǵaıtýǵa, halyqaralyq mádenı keńistikte Qazaqstannyń abyroıyn asqaqtatýǵa yqpal etedi. 

Aıta ketelik Astanada mádenıet qaıratkerlerine memlekettik stıpendııa tapsyrylǵan edi.