Mádenıet qaıratkeri, halyq aǵartý isiniń úzdigi, eńbek ardageri, ulaǵatty ustaz Tórtken Kenenqyzy dúnıeden ótti
ASTANA. KAZINFORM - QR Mádenıet jáne aqparat mınıstrligi Qazaqstannyń mádenıet qaıratkeri, halyq aǵartý isiniń úzdigi, eńbek ardageri, ulaǵatty ustaz Tórtken Kenenqyzynyń dúnıeden ótýine baılanysty týǵan-týystary men jaqyndaryna, barsha shákirtteri men zııaly qaýym ókilderine, týǵan halqyna qaıǵyryp kóńil aıtty.
-Tórtken Kenenqyzy sanaly ǵumyryn urpaq tárbıesine, ulttyq óner men mádenıetti damytýǵa arnaǵan tulǵa edi. Ol uzaq jyldar boıy bilim berý salasynda tabandy eńbek etip, talaı shákirttiń boıyna ana tili men ádebıetke, ulttyq qundylyqtarǵa degen súıispenshilik darytty. Halyq aqyny, ánshi-kompozıtor Kenen Ázirbaevtyń perzenti retinde áke amanatyna erekshe adaldyq tanytty. Kenenniń án-jyrlaryn jınap, zerttep, keıingi býynǵa jetkizýge ólsheýsiz úles qosty,-delingen habarlamada.
Sondaı-aq onda Tórtken Kenenqyzynyń ónegeli ómiri, ustazdyq ulaǵaty, ónerge degen adaldyǵy men ulttyq rýhanııatqa sińirgen eńbegi keıingi býyn úshin árdaıym úlgi-ónege bolatyny aıtylǵan.
-Asyldyń synyǵy bolǵan ardaqty ananyń ǵıbratty ǵumyry men jarqyn beınesi halyq jadynda máńgi saqtalady. Marqumnyń jany jánnattan jaı taýyp, ımany salamat, jatqan jeri jaryq, topyraǵy torqa bolsyn!-delingen mınıstrlik habarlamasynda.
Osyǵan deıin belgili jýrnalıst, aqyn Jumabek Tabynbaevtyń dúnıeden ótkenin jazdyq.
