Mádenıet - halyq bolyp qalyptasyp, ult uıyǵan jerde ǵana paıda bolady - Sovet- Han Ǵabbasov
ALMATY. Qańtardyń 19-y. QazAqparat /Erlik Erjanuly/ - Ulttyq ıdeologııa bolmaı mádenıet órkendemeıdi. Bul búgin Almatydaǵy «Taǵylym» mádenı-ıntellektýaldyq klýbynyń «Qala mádenıeti men aýyl mádenıeti arasyndaǵy aıyrmashylyqtar» degen taqyryptaǵy ekinshi otyrysynda aıtyldy,
dep habarlaıdy QazAqparat.
«Mádenıet degen - halyqtyq mentalıtetiniń kórsetkishi. Jaǵdaıǵa baılanysty ol aýyldyq jáne qalalyq bop ekige bólindi. Aýyldyq mádenıet degen bul dástúrli mádenıet. Ol halqymyzdyń ǵasyrdan-ǵasyrǵa jalǵasyp kele jatqan ata-babamyz jasaǵan dástúr-saltqa súıengen mádenıet. Osydan aýytqyǵan qalanyń mádenıeti», deıdi medıtsına jáne pedagogıka ǵylymdarynyń doktory, professor Sovet-Han Ǵabbasov. Onyń aıtýynsha, mádenıettiń ósip-órkendeýi ulttyq ıdeologııaǵa baılanysty. Oǵan tabıǵı qazba baılyǵy joq Japonııa eliniń tájirıbesi úlgi bola alady. Olardy álemde ekonomıkalyq jaǵynan ǵana emes, áleýmettik-mádenı jaǵynan damyǵan eń ozyq memleketke aınaldyrǵan basqarýshylyq jáne uıymdastyrýshylyq júıeleri boldy. Bul júıeler qoǵamnyń barlyq salasy úshin qajet. Endi ǵylymı-zerteý ınstıtýttary ony damytýdyń tetikterin quzyrly organdardyń nazaryna usynýy kerek. Onysyz eshbir is ilgeri baspaıdy.
