Mádenıet basqarmasy astana teatrlaryna balalardyń tegin kirýi úshin 63 mln teńge surap otyr

NUR-SULTAN. QazAqparat – Nur-Sultan qalasy mádenıet basqarmasynyń basshysy Sanat Shapashov qala teatrlaryna balalardyń tegin barýy úshin 63 mln teńgeden astam qarjy surady, dep habarlaıdy QazAqparat tilshisi.

«Balalar jylyn ótkizý jónindegi is-sharalar josparyna sáıkes «Balalar men teatrlar» baǵdarlamasyn iske asyrý aıasynda Qýyrshaq teatry, Jas kórermenderdiń mýzykalyq teatry, Jastar teatry, M.Gorkıı atyndaǵy memlekettik akademııalyq orys teatry jáne Nomad City Hall nysandaryna balalardyń tegin barýy úshin 63 mln 681 myń teńge qajet», - dedi Sanat Shapashov máslıhat otyrysynda.

Onyń sózine qaraǵanda, jalpy qalada mádenıet salasyn damytýǵa 7 mlrd 879 mln 169 myń teńge kerek. Onyń ishinde jyl aıaǵyna deıin memlekettik shyǵarmashylyq tapsyrys aıasynda 40 myń vaýcherdi jan basyna shaǵyp qarjylandyrýǵa 5 mlrd 578 mln teńge jumsalady.

«Sondaı-aq, Mádenıet jáne sport mınıstrligine de osy somada qosymsha ótinim jiberildi. Qaladaǵy vaýcherlerdiń jalpy sany – 40 586», - dedi Sanat Shapashov.

Máslıhat otyrysynda Nur-Sultannyń jańa kóshelerine ólkedegi kóne tarıhı ataýlar beriletini aıtyldy.