Mádenı-týrıstik is-sharalardy brend retinde qalyptastyrý qajet - Ulttyq quryltaı

ASTANA. KAZINFORM – Prezıdent Qasym-Jomart Toqaev el óńirlerinde ótetin mádenı-týrıstik is-sharalardy keńinen dáripteýdi júktedi.

- Týrızm - aımaqtardyń damýyna serpin beretin sala bolýǵa tıis. Jergilikti jerdegi respýblıkalyq jáne halyqaralyq is-sharalar óńirlerdiń týrıstik áleýetin arttyrýǵa yqpal etedi. Bıyl Tarazda ótetin «Dostastyq jármeńkesi» osyndaı jobanyń biri bolmaq. Jármeńkege kóptegen eldiń qolónershileri men aýyl sharýashylyǵy mamandary shaqyryldy, - dedi Qasym-Jomart Toqaev Býrabaıda ótip jatqan ulttyq quryltaıda. 

Memleket basshysynyń málimdeýinshe, atalǵan is-shara seriktes eldermen ekonomıkalyq baılanysymyzdy odan ári kúsheıte túsedi. 

- Sonymen qatar eń kóne saýda jáne mádenıet ortalyǵynyń biri – Taraz qalasynyń bedelin arttyra túsedi, oblysqa jańa ınvestıtsııa tartýǵa jáne týrısterdiń kóptep kelýine septigin tıgizedi. Jalpy ár aımaqta jurtshylyq asyǵa kútetin ári dástúrge aınalǵan osyndaı mańyzdy mádenı-týrıstik is-sharalar ótip turady. Ony negizinen demeýshilerdiń qarajaty esebinen uıymdastyrǵan jón. Іs-sharalardy jyl boıy jalǵasatyndaı etip birkelki bólý, brend retinde qalyptastyryp, jarnamalaý qajet. Árbir oqıǵa buqaralyq aqparat quraldary arqyly kórsetilip, el ishinde jáne shetelderde jurt nazaryna iligýge tıis. Munyń bári adamdardyń aımaqtarǵa qyzyǵýshylyǵyn arttyryp, týrızmdi damytýǵa múmkindik beredi, - deıdi Prezıdent. 

Buǵan deıin Qasym-Jomart Toqaev shekaralyq eldi mekenderdiń ahýalyna toqtalǵan edi. 

Sonymen qatar Memleket basshysy ulttyq quryltaıda qazaq halqyn danyshpan dep aıtsaq, qatelespeımiz degen bolatyn.