Mádenı saıasat tujyrymdamasyn iske asyrýǵa baǵyttalǵan zań qabyldandy - Parlament
ASTANA. QazAqparat - Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine mádenıet jáne tarıhı-mádenı mura máseleleri boıynsha ózgerister men tolyqtyrýlar engizý týraly» QR Zańy qabyldandy. Qujat Memleket basshysy N. Nazarbaevtyń «Nur Otan» partııasynyń XVI sezinde júktegen tapsyrmalaryn, sondaı-aq QR mádenı saıasatynyń tujyrymdamasyn iske asyrýǵa baǵyttalady.
Jalpy alǵanda Parlament qabyldaǵan zań qoldanystaǵy tsırk, teatr óneri, mýzeı jáne kitaphana qyzmetteri, qoǵamdyq mańyzy bar ádebıetti basyp shyǵarýdy, sonymen birge tarıhı-mádenı mura máseleleri boıynsha mádenıet salasyndaǵy zańnamany jetildirýdi kózdeıdi. Sonymen qatar, Qazaqstan ratıfıkatsııalaǵan materıaldyq emes mádenı murany qorǵaý týraly konventsııa negizinde materıaldyq emes mádenı murany qorǵaýǵa jáne BUU qyzmetine Qazaqstannyń qatysýyna baǵyttalǵan normalar qamtylady.
Toqtala ketetin jaıt, zańǵa sáıkes, endi Qazaqstan aýmaǵynda jańa qurylystar men monýmentterdi ornatý, tarıh jáne mádenıet eskertkishterine ǵylymı-jańǵyrtý jumystaryn júrgizý, memlekettik múlik bolyp tabylatyn tarıhı-mádenı mura nysandaryna qatysty jergilikti atqarýshy organdardyń ókilettigin ajyratý kózdeledi.
Qujatqa sáıkes, mádenı qoǵamdastyqty tartý jáne mádenıet salasyndaǵy basqarýshylyq máselelerdi úılestirý maqsatynda QR Prezıdenti janynan Ádebıet jáne óner jónindegi ulttyq keńes qurý kózdelgen. Budan bólek, mádenıet salasyndaǵy memlekettik saıasatty jetildirý úshin ýákiletti organ janynan salalyq kórkemdik keńester qurý da qarastyrylady.
